Иргэн Р.Ууганбаатар, М.Цэнджав, Ш.Буянжаргал нар “Эрдэнэс Тавантолгой” ХК-ийг иргэдэд 100 хувь өмчлүүлэхийг уриалан мэдээлэл хийлээ.

Тэд “ЗГХЭГ-ын дарга Д.Амарбаясгалан мэдэгдэл хийж 2028 он хүртэл нэгж хувьцааны үнийг 933 төгрөгөөс өсгөхгүй гэж хэлсэн. Баялгийн сангийн тухай хуулийг яаралтай горимоор өргөн барьсан байгаа. Мөн үүнтэй уялдуулан Ашигт малтмалын тухай хуулиар ЭТТ компанийг нээлттэй компани болгоно гэж байна. Ийм байдлаар нээлттэй компани болгох юм бол бид ЭТТ-г 850 дахин бага үнээр алдана гэсэн үг. Үүнийг мэдээд бид Сүхбаатарын талбай дээр 10 хоног жагсаж, өнөөдөр хэвлэл мэдээллийн хэрэгслээр мэдэгдэж, дараа нь Төрийн ордон орж шаардлага хүргүүлэхээр шийдлээ.

Монголчууд анхаарах хэрэгтэй байна. Тавантолгой бол Монголын хувь заяа, том орд. 13 жил зөөчхөөд байхад, 200 сая тонн нүүрс зөөчхөөд байхад хотойхгүй байгаа орд. Жил бүрийн сонгуулийн мөнгийг өгчхөөд хотойхгүй байгаа, улсын төсвөөс 100 дахин том орд. Хэрэв төгрөгөөр үнэлэх юм бол 16 оронтой тоо. Төгрөгөөр үнэлье гэвэл бидэнд шинэ тоо хэрэгтэй болно. Ийм ордын тухай ард түмэн ярихгүйгээр ядуурлаас яаж гарах вэ.

Бүх ард түмэнд энэ компанийн хувьцааг 100 хувь хувааж өгөх хэрэгтэй. Мөн нэгж хувьцааны үнийг 933 төгрөг биш 70 мянган төгрөг болгох ёстой гэдэг шаардлагыг УИХ-д хүргүүлж байна” гэв.

Шаардлагад:

• Эрдэнэс Тавантолгой компанийн 1072 хувьцааг Монгол Улсын иргэн бүрд өмчлүүлэхгүй, зөвхөн эзэмшүүлэхээр заасан УИХ болон Засгийн газрын бүх тогтоолыг хүчингүй болгох
• Компанийн 15 тэрбум ширхэг энгийн хувьцааг ард түмэнд эн тэнцүү, үнэ төлбөргүй, 100 хувь хуваан өмчлүүлэх
• 1072 хувьцааг 1 сая төгрөгтэй дүйцүүлэн, нэгж хувьцааны нэрлэсэн үнийг 933 төгрөгөөр тогтоосон Засгийн газрын 2012 оны 181 тогтоолыг хүчингүй болгох. Нэгж хувьцааны нэрлэсэн үнийг 70 мянган төгрөг болгон нэмэгдүүлэх зэрэг 9 агуулгыг тусгажээ.