ОХУ-ын ерөнхийлөгч Владимир Путин 2022 оны хоёрдугаар сарын 24-нд Украины нутаг дэвсгэрт цэргийн тусгай ажиллагаа эхлүүлж буйгаа зарласнаас хойш дөрвөн жилийн хугацаа өнгөрөв. 

Энэ нь хоёр улсын төдийгүй дэлхий дахины чих тавих асуудал болсон төдийгүй Дэлхийн II дайнаас хойш Европ тивд болсон хамгийн том мөргөлдөөн болсон юм.

Орос, Украин аль аль нь цэргийн хохирлын талаар цаг тухайд нь албан ёсны мэдээлэл гаргадаггүй. Гэхдээ олон улсын судалгаа, тооцооллын байгууллагуудын гаргасан зарим тоон мэдээллээс хүргэе. 

2022 оны хоёрдугаар сараас 2025 оны арванхоёрдугаар сар хүртэл талуудад 1.2 сая орчим цэрэг амь үрэгдсэн, шархадсан эсвэл сураггүй болсон байна. 

Үүнээс ОХУ 325 мянган орчим цэргээ алдсан байж болзошгүй гэж тооцоолжээ. 

Харин Украины цэргийн хохирлыг 500-600 мянга гэж тооцоолсон бөгөөд үүнээс 140 мянга нь амь үрэгдсэн байж болзошгүй аж. 

Гэхдээ Украины ерөнхийлөгч Володимир Зеленський энэ сарын эхээр 55 мянга орчим украин цэрэг амь үрэгдсэн ба олон хүн сураггүй болсон гэж мэдэгдсэн. 

НҮБ-ын Хүний эрхийн хяналтын төлөөлөгчийн мэдээлснээр 2022 оноос хойш дайны улмаас Украинд 763 хүүхэд амь үрэгдсэн гэв.

Гадаад цэргийн тусламжийн хувьд Дональд Трамп ерөнхийлөгч болсноос хойш АНУ-аас Украинд олгож байсан зэвсгийн тусламж зогссон. Хоёр улсын нөхцөл байдлын зарим гэрэл зургийг Ройтерс агентлагийн албан ёсны зөвшөөрөлтэйгөөр хүргэж байна.