Баялаг бүтээгчдийг мэргэжлийн болон техникийн боловсролын ур чадварын түншлэлд урьжээ.  

Энэ дагуу өнөөдөр мэргэжлийн болон техникийн боловсролын сургалтын зарим байгууллагын менежментийг хувийн хэвшилд шилжүүллээ.Ерөнхий сайд Н.Учрал, Боловсролын сайд Л.Энх-Амгалан, ХХААХҮ-ийн сайд Ц.Идэрбат, АЖЭБ-гийн сайд Г.Дамдинням нар ёслолд оролцов.   
 
Төр, хувийн хэвшилтэй хамтран ажиллаж, түнш байгууллагын шинэ тогтолцоо нэвтрүүлнэ.

Аж ахуйн нэгж, компаниуд өөрсдийн хэрэгцээ шаардлага, цаг үетэйгээ нийцүүлэн сургалтын агуулга, хөтөлбөрийг хамтран шинэчилнэ. Санхүүжилт, хөрөнгө оруулалтын төлөвлөгөө хэрэгжүүлнэ. Ингэснээр аж ахуйн нэгжүүд өөрсдийн хэрэгцээнд нийцсэн чадварлаг боловсон хүчин бэлтгэх боломж бүрдэнэ.

Сургуулийн дэргэд хувийн хэвшлийн оролцоотой дадлага, сургалтын төв, лаборатори, гарааны компани байгуулахад хөрөнгө оруулах, хамтарсан үйлдвэрлэл, үйлчилгээ эрхлэх боломжийг нээнэ.​ 

Сургалтын орчин, тоног төхөөрөмжид хөрөнгө оруулах санхүү, татварын таатай нөхцөл бүрдүүлэх давуу тал бүрдэнэ. Мөн тухайн суралцагчийг цалинтай дадлагажих, ажиллах боломжийг нээж өгөх юм байна. Хувийн хэвшлийг төлөөлж MCS группийн захирлуудын зөвлөлийн дарга Ж.Оджаргал, Таван богд группийн Ерөнхийлөгч Ц.Баатарсайхан, Шунхлай группийн ТУЗ-ийн дарга П.Батсайхан нар оролцжээ.   

Ерөнхий сайд Н.Учрал "Ирээдүйн чадварлаг ажилтан, өрсөлдөх чадвартай боловсон хүчин бэлтгэгдэх боломжтой боллоо. Өнөөдрийн хөдөлмөрийн зах зээлд онолын мэдлэгээс гадна практик ур чадвар, ажлын байрны дадлага, шинэ технологид дасан зохицох чадвар үнэ цэнтэй байна. Сургууль дангаараа ур чадвар бэлтгэдэг тогтолцоо үеэ өнгөрөөсөн. Төгсөгчид дипломтой ч ажилд бэлэн бишээс болж хувийн хэвшил ур чадвартай ажилтан хайсаар байна. 

Тиймээс ур чадвартай, шилдэг хүний нөөц бэлтгэх тогтолцоонд шилжих шаардлагатай. Баялаг бүтээгчдэд менежмент шилжсэнээр

• Шаардлагатай мэргэжлээр хүний нөөц, ур чадвартай боловсон хүчин бэлтгэгдэнэ
•  Баталгаатай ажлын байртай болно.
•  Суралцах явцад тэтгэлэг авна.
•  Сургалтын чанар, хөтөлбөр сайжирна.
•  Дадлага, сургалтын төв, лаборатори, гарааны компани байгуулах, хамтарсан үйлдвэрлэл, үйлчилгээ эрхлэх боломжтой болно​.
•  Сургалтын орчин, тоног төхөөрөмжид хөрөнгө оруулалт хийгдэж, суралцах таатай орчин бүрдэнэ.

Энэ тогтолцоо Германаас эхлээд дэлхийн олон оронд хэрэгжиж үр дүнд хүрсэн гэв.