Ази тивийн шатрын аварга шалгаруулах шатрын тэмцээн энэ сарын 29-нөөс ирэх сарын 7-ны хооронд Улаанбаатар хотын Баянгол зочид буудалд болно. 

Монголын шатрын холбоо Азийн шатрын холбоо болон Олон улсын шатрын холбоотой хамтран тэмцээнийг зохион байгуулж байна. Нийт 27 орны 248 тамирчин өрсөлдөж байгаагаас 147 нь эрэгтэй, 101 нь эмэгтэй тамирчин. Гадаадын 172 шатарчин Монголд иржээ.

Тэмцээний нийт шагналын сан 100 мянган  ам.доллар. Эрэгтэй тэргүүн байрын шагнал 15 мянган ам.доллар бол эмэгтэй тэргүүн байрынх 12мянган ам.доллар. 

Шатрын олон улсын мастер М.Амилал, Би АНУ-ын Миссуригийн их сургуульд суралцдаг. Хичээл амраад эх орондоо ирэн, хоёр долоо хоногийн турш энэ тэмцээнд бэлдсэн. Монголд анх удаа дэлхийн хэмжээний шатрын тэмцээнд өрсөлдөх нь надад бусад тэмцээнээс илүү онцгой санагдаж байна. Өөр улс руу нисэж, нэмэлт зардал гаргах шаардлагагүй, гэр бүлийнхээ дэргэд, тайван орчинд тэмцээндээ оролцож байгаа болохоор сэтгэл санаа маш сайхан байна гэв. 

Эмэгтэй дэд мастер Н.Содгэрэл, Олон улсын шилдэг шатарчид Монголд ирж, нэг дор өрсөлдөж буйд үнэхээр баяртай байна. Өдөр бүр тасралтгүй бэлтгэл хийдэг учраас тэмцээндээ өөрийгөө бүрэн бэлэн гэж бодож байна. Би БНХАУ-ын тамирчин Gao Muziyan-ыг хамгийн хүчтэй өрсөлдөгчдийн нэг гэж боддог. Түүнтэй нэг тэмцээнд өрсөлдөх нь надад том туршлага болно” хэмээн сэтгэгдлээ илэрхийллээ. ”

Энэ тэмцээнээс байр эзэлсэн шатарчид шатрын дэлхийн аварга шалгаруулах тэмцээнд шууд оролцох эрх авах юм. Тэмцээний нээлтэд Ерөнхий сайд асан Г.Занданшатар, УИХ-ын дарга С.Бямбацогт оролцов.