УИХ-ын чуулганы нэгдсэн хуралдаан /2026.05.21/ эхэллээ. Өнөөдөр хэлэлцэх асуудал олон байгааг дурдаад "Нэлээд ачаалалтай хуралдана" гэдгийг УИХ-ын дарга С.Бямбацогт онцлов.

• Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл
• Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд 
• Монгол Улсын Их Хурлын хяналт шалгалтын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын  төслүүд 
• Гадаад зээлийн ашиглалт, үр ашгийг нэмэгдүүлэх тухай хуулийн төсөл 
• Монгол Улсын Ерөнхийлөгчийн сонгуулийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл  
• Эрүүгийн хуульд нэмэлт, өөрчлөлт оруулах тухай хуулийн төсөл 
• Олон хүүхэд төрүүлж өсгөсөн эхийг урамшуулах тухай хуульд өөрчлөлт оруулах тухай хуулийн төсөл 
• Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөл 
• Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүд 

Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслийг хэлэлцэж байна. Үүнтэй холбоотойгоор УИХ-ын гишүүн Б.Пүрэвдорж асуулт асуув. 

Тэрбээр "УИХ-ын гишүүд иргэдийн санаа бодлыг төрд хүргэх ажлыг асуулт асуух, үг хэлэх байдлаар хийдэг. Гэтэл минутын хязгаарлалт тавьчхаад үг хэлэх эрхэнд шууд халддаг. 

Дэгийн тухай хуульд өөрчлөлт оруулах болохоор л миний эсрэг юм хийж байдаг. Зэрэг үг хэлж болохгүй, хашхирч болохгүй, бусдын нэр хүндэд халдвал шууд хориглоно гээд заасан байна. Ингэж хориглож болохгүй. Тодорхой үндэслэлтэй үгийг хэлэх л ёстой" гэв. 

Үүний хариуд УИХ-ын гишүүн, хууль санаачлагч Ж.Бат-Эрдэнэ "Бусдын нэр хүндэд халдах, гүтгэх, доромжлох асуудлууд чуулганы танхимд их гардаг. Б.Пүрэвдорж гишүүн өөрөө нэлээд хатуухан үгтэй. Энэ дээр эмзэг байх шиг байна. Ер нь бол Ёс зүйн дэд хороогоор асуудлаа шийдье л гэж байгаа юм" гэв. 

Уг хуулийн төсөлд 

8.7.2.энэ хуулийн 8.5-д заасан гишүүний хууль тогтоох, хянан шалгах бүрэн эрхээ хэрэгжүүлэхэд чиглэсэн ёс зүйн нийтлэг хэм хэмжээ, шаардлагыг зөрчсөн үйлдэлд энэ хуулийн 8.6-д заасан ирц, саналаа биечлэн өгсөн байдлын мэдээллийг үндэслэн Ёс зүйн дэд хороо дараах хариуцлага хүлээлгэнэ:

• 8.7.2.а.30 хүртэл хоногоор хуралдаанд асуулт асуух, үг хэлэх эрх хасах;
• 8.7.2.б.уучлалт гуйхыг үүрэг болгох;
• 8.7.2.в.албан тушаалын цалинг 20 хувиар 3 сар хүртэл хугацаагаар бууруулах;
• 8.7.2.г.гишүүний зөвлөх, туслах, бие төлөөлөгч-туслахын цалингийн зардлаас бусад энэ хуулийн 42.1-д заасан гишүүний нэг сард оногдох санхүүжилтийг олгохгүй байх гэж тусгасан байна.