Орон сууц, нийтийн аж ахуйн удирдах газар (ОСНААУГ) Улаанбаатарын оршин суугч,  хэрэглэгчдийг дулааны эрчим хүч, хэрэгцээний халуун, хүйтэн усаар хангадаг. Мөн  бохир усыг татан зайлуулах үйлчилгээг  24 цагийн турш тасралтгүй найдвартай үзүүлж байна. 

ОСНААУГ-ын Хэрэглэгчдэд үйлчлэх төв-2-ын ахлах инженер М.Даариймаатай ярилцлаа. 

Тэрбээр "Бид өглөө бүр шуурхай хурал хийдэг. Бид энэ хурлаар өнгөрсөн 24 цагт манай төвд ямар дуудлага ирсэн, тэр бүрийг хэрхэн засварлаж, шийдвэрлэсэн талаараа ярилцаж хэлэлцдэг.

Дуудлага гомдол улирал, сараар ялгаатай байдаг. Зарим сард их зарим үед бага гэх мэт. Тухайлбал Цагаан сарын өмнө өрхүүд угаалга, цэвэрлэгээгээ хийж эхэлдэг. Үүнтэй холбоотойгоор усны хэрэглээ ихсэж, улмаар усны даралт унах тохиолдол гардаг. Үүнийг тухай бүрд нь тохируулах шаардлагатай болно.  

Хэрэглэгчдэд үйлчлэх төвүүд байршлаар хуваагдан ажилладаг. Тухайн орон сууц шинэ, хуучнаас шалтгаалан шугам хоолойнуудад харилцан адилгүй эвдрэл гэмтлүүд үүсдэг. Ер нь шугам хоолойны насжилттай холбоотой байдаг. 

Бид ил хэсгийн шугам хоолойг хянаад хэрэглэгчдэд хэзээ солих, ямар материал орох зэргийг зөвлөөд өдрөө тохирон сольж өгдөг. Хана, таазны завсар гэх мэт нүдэнд харагдахгүй далд шугамууд бас бий. 

Манай дээр ихэвчлэн халаалт, ус алдах, тоолуур, бохиртой холбоотой дуудлагууд ирж байна. Бид дуудлагаа ангилаад дийлэнхийг нь тухайн өдөрт нь шийдвэрлэхээр хичээдэг. Гэхдээ завсар дундаа гэмтэлтэй байвал хугацаа шаардана. 

Үүнийг бид засвар үйлчилгээний хэсэгт шилжүүлж 24 цагийн дотор шийдвэрлэж ажилладаг. Хэрэглэгчийн дуудлагыг 24 цаг тасралтгүй авч байна. 

Борлуулалтын байцаагч нар өрхүүдээс тоолуурын заалт авдаг. Biller.ub.kontor.mn цахим хуудсыг хөгжүүлээд явж байна. Айл болгонд нэвтрэх нэр, код бий. Үүгээр нэвтэрч, халаалт болон ус нь хэдэн төгрөг гарсан зэрэг дэлгэрэнгүй мэдээллийг авах боломжтой. Одоохондоо хэвшил болоогүй байна. 

Айлуудын хаалган дээр мэдэгдэл наадаг. Энийг шууд бүрэн зогсоох боломжгүй. Учир нь мэдэгдлээ хүлээдэг өрхүүд бий" хэмээн ярьсан. Түүний ярилцлагыг дэлгэрэнгүй үзнэ үү.