УИХ-ын чуулганы үдээс хойших хуралдаан үргэлжилж байна. Ногоон санхүүжилтийг бүрдүүлэх эрх зүйн орчныг сайжруулах талаар авах арга хэмжээний тухай тогтоолын төслийг хэлэлцэж байна. 

Хэлэлцэж буй асуудалтай холбоотойгоор гишүүд асуулт асуулаа. Энэ үеэр УИХ-ын гишүүн Ц.Баатархүү "Өнгөрсөн 30 жилийн хугацаанд МАН удирдсан. Үр дүн нь өнөөдрийн Улаанбаатар хот. Нийт өрхийн 60 гаруй хувь нь гэр хороололд, дэд бүтцийн хүрэлцээгүй газар амьдарч байна. үндсэн хуулиар олгогдсон эрүүл, аюулгүй орчинд амьдрах эрхээ эдлэж чадахгүй байна.

Оруулж ирж буй төсөл бүр уриа лоозонгийн шинжтэй байдаг, хэрэгждэггүй. Одоо байгаа хотын удирдлагатайгаа зөвлөлдсөн үү? Зуух тараана гэсэн, больсон. Газаар халаах тухай яриад больсон. Дулаалгын тухай ярьсан, хойшлуулсан. Таван толгойн 0 давхаргын нүүрсээр түлшээ солих тухай яриад хойшлууллаа. Одоо БНХАУ-аас хөх нүүрс авчрах тухай ярьж байна.

Монгол Улсад агаар, орчны бохирдлыг бууруулах, ногоон санхүүжилтийг шийдвэрлэх нэгдсэн бодлого гэдэг зүйл алга. Хот, орон нутаг нь өөр зүйл ярьж байна" гэв.

УИХ-ын гишүүн Б.Жаргалан "2025.06.05-нд УИХ-аас 53 тоот тогтоол баталсан. Үүгээр гурван жилийн дотор агаарын чанарыг Монгол Улсын стандартын жилийн дундаж үзүүлэлтэд бүрэн нийцүүлэх зорилт тавьсан.

Мөн төсвийн хөрөнгөөр зуух, яндан, түлш зэрэг агаарын бохирдлын эх үүсвэрийг санхүүжүүлэхгүй байх шийдвэр гаргасан. Гэтэл нийслэлээс гарч буй шийдвэр уялдахгүй байна.

Энэ сарын 13-нд НЗДТГ-аас БНХАУ-аас хөх нүүрс буюу хагас коксжих нүүрсийг 226 тэрбум төгрөгөөр худалдаж авах тендер зарлачхаад байна. Өөрөөр хэлбэл бид ирэх жил дахиад төсвийн мөнгийг агаарт хийсгэнэ. Тэгэхээр УИХ-ын 53 дугаар тогтоолын хэрэгжилтийг хангаж ажиллах хэрэгтэй байна" гэлээ.