Монголын допингийн эсрэг байгууллага бөхчүүдийн допингийн шинжилгээний хариуг танилцуулж байна. 

Тулгар төрийн 2234, Их Монгол Улсын 819, Үндэсний эрх чөлөө, тусгаар тогтнолоо сэргээн мандуулсны 114 жил, Ардын хувьсгалын 104 жилийн ой, Үндэсний их баяр наадмын бөхийн барилдаанд 4 түүнээс дээш давсан 32 бөхөөс долоодугаар сарын 12-ны өдөр шинжилгээ авсан юм.

Үндэсний их баяр наадамд барилдсан, 4 ба түүнээс дээш давсан 32 бөх болон сур харвааны 16 тамирчны сорьцыг гэрээнд заасан хугацаагаар буюу энэ сарын 13-ны өглөө Улаанбаатараас илгээсэн. 14-ний шөнийн 2 цагт Германы лабораторид хүргэсэн. 

16-ны 15 цагт албан ёсны цахим хуудсаар нийт 48 тамирчнаас 43-ынх нь хариу ирсэн. 18-ны өдөр гурван тамирчны хариу ирсэн. 22-ны өдөр нэг тамирчны хариу ирж, нэг хүний шинжилгээ дуусаагүй байгааг мэдэгдсэн гэв.

Хоёр тамирчнаас дөрвөн зөрчил илэрсэн. Нэг тамирчных эргэлзээтэй /IRMS/ байгаа аж. Эргэлзээтэй хариуг олон улсын стандартын дагуу цааш нягтлуулах үүрэгтэй. Энэ үйл явц 21-28 хонодог. 

Орон нутгийн наадмын тухайд, 84 тамирчны шинжилгээний сорьцыг шинжлүүлсэн. Ингэхэд найман тамирчнаас зөрчил илэрсэн байна. Гурван тамирчны хариу эргэлзээтэй, нэг тамирчны хариу ирээгүй. 

Үндэсний их баяр наадмын тухайд, зөрчил илэрсэн хоёр бөхийн нэг нь Хэнтий аймгийн арслан Н.Баяржаргал гэдгийг хэлэв. Харин нөгөө тамирчинтай холбогдож чадаагүй, өөрт нь шинжилгээний хариуг мэдээлээгүй байгаа тул олон нийтэд дэлгэх боломжгүй гэлээ. 

Н.Баяржаргалын хувьд хотод ирмэгцээ үр дүнгийн удирдлагын багтай уулзаж, албан ёсны тайлбараа өгнө хэмээн мэдэгдсэн байна.

Одоогийн байдлаар 48 тамирчны 47-ийнх нь хариу ирсэн. Завхан аймгийн Б.Гончигдорж гарьдын хариу эцэслэгдэн ирээгүй гэв.