“Метал хөгжмийн өлгий нутаг” гэгддэг Бирмингем хотод алдарт уран бүтээлч Оззи Осборнтой түүний гэр бүл, найз нөхөд, үнэнч фэнүүд нь салах ёс хийлээ. Тэрбээр өнгөрсөн мягмар гарагт 76 насандаа таалал төгссөн юм.

Black Sabbath хамтлагийн олон мянган фен өчигдөр хамтлагийн дуучин, домогт Оззи Осборнд хүндэтгэл үзүүлэн түүнийг шарилыг авч явсан автомашины цувааг даган хотын гудамжаар алхжээ. 

Цуваа Осборны төрж өссөн Бирмингем хотын төв зам болох Broad Street-ээр дайрч, 2019 онд Broad Street-ийн гүүрэн дээр байрлуулсан Black Sabbath-ийн сандал хүрчээ. Цуваа ирэхэд фенүүд нь түүний нэрийг дуудан орилж байв.

Осборны гэр бүлийнхэн зургаан машинтайгаар араас нь даган явжээ.  Түүний 43 жил ханилсан гэргий Шэрон Осборн нулимсаа барьж ядан гарч ирсэн байна. Охин, хүү хоёр нь түүнийг түшсээр хүндэтгэлийн цэцгийн талбайд хүргэж өгөхөд тэр хар цаасан боолттой цэцгээ тавиад, Oззигийн имиж болсон позоор дахин хүндэтгэл үзүүлжээ. Тэнд цугларсан хүмүүс ч мөн "энх тайван" бэлгэдсэн уг позоор түүнд хүндэтгэл үзүүлж байв. 

Үнэнч фэн Энтони Хант хүндэтгэл үзүүлэхээр заавал ирэхийг хүссэн талаараа ярьжээ. Тэрбээр “Энд бүх бага насны хүүхдүүдээс эхлээд өсвөр үеийнхэн, 60, 70 гарсан хүмүүс гээд бүх насныхан цугласан байна. Энэ үнэхээр гайхалтай” хэмээв.

Осборны нас барсан мэдээ гарснаас хойш фенүүд нь Бирмингемын нэр хүндтэй газруудаар зочлох нь ихэсжээ. Олон нийт түүнийг метал хөгжмийн “Загалмайлсан эцэг” хэмээн үзэж, зарим үед “Харанхуйн ханхүү” хэмээн өргөмжилдөг байжээ. 

Түүний намтрыг ЭНД дарж хүлээн авна уу. 

Эх сурвалж: CNN