Улсын Их Хурлын чуулганы нэгдсэн хуралдаан болж байна. Өнөөдрийн хурлаар дараах асуудлыг хэлэлцэнэ.

• Монгол Улсын Үндсэн хуулийн цэцийн 2025 оны 12 дугаар дүгнэлт /Монгол Улсын Их Хурлын чуулганы хуралдааны дэгийн тухай хуулийн 101 дүгээр зүйлийн 101.1, 102 дугаар зүйлийн 102.1 дэх хэсгийн холбогдох зохицуулалт Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/
• Монгол Улсын Үндсэн хуулийн цэцийн 2026 оны 01 дүгээр дүгнэлт /Үндсэн хуулийн цэцэд маргаан хянан шийдвэрлэх ажиллагааны тухай хуулийн 14 дүгээр зүйл Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/
• Монгол Улсын Засгийн газрын 2024-2028 оны үйл ажиллагааны хөтөлбөрийн 2025 оны гүйцэтгэлийн тайлан, Монгол Улсын хөгжлийн 2025 оны төлөвлөгөөний гүйцэтгэлийн тайлан
• Бусад

Чуулганы хурлаар хэлэлцэж буй Ерөнхий сайдыг огцруулах, итгэл хүлээлгэх тухай маргаан буюу Монгол Улсын Үндсэн хуулийн цэцийн 2025 оны 12 дугаар дүгнэлтийн талаар УИХ-ын гишүүн А.Ариунзаяа үг хэллээ.  

Тэрбээр "УИХ Цэцийн дүгнэлтийг хүлээн авч, заалтуудыг Үндсэн хуульд нийцүүлж шуурхай засах шаардлагатай юм байна. Үндсэн хуулийн "10 хоног дотор хэлэлцэнэ" гэдэг хугацаатай холбоотойгоор, хэрэв тухайн өдөр чуулганы ирцэд орохгүй байвал яах вэ гэдэг зохицуулалтыг Дэгийн тухай хуульд оруулах хэрэгтэй гэж бодож байна. 

Тухайн үед ирцэд ороогүй гишүүд өөрөөсөө нэхээгүй ёс зүйг бусдаас нэхэж бойкотлож байгаа. Х.Булгантуяа чуулганы хуралдааныг даргалж, ирцийг өдөр шөнөгүй нэхэж шаардсаны төлөө өнөөдөр гэм буруутан юм шиг нийгэмд ч, холбогдох байгууллагуудад ч шалгагдаад ийм дүгнэлт гаргуулаад явж байгаа нь харамсалтай. Энэ бол жинхэнэ шившиг" гэв.