13 настай Г.Асралт болон түүний дөрвөн хөлт найзын бичлэг цахим орчинд тарж, олон хүний хайрыг булаасан. Хүү өдөр бүр хөлбөмбөгийн талбай руу дугуйгаар явахдаа нохойгоо нуруундаа үүрээд явдаг байна. 

Тэрбээр "Өчигдөр харин хоёр ах бичлэг хийснийгээ сошиалд тавьсан юм байна лээ. Өглөө хартал олон хүнээс биднийг өхөөрдсөн зурвасууд авсан байсан. Миний нохой их цовоо сэргэлэн болохоор Цооцог гэж нэрлэсэн" гэв. 

7 сартай Цооцогийн өмнөх эзэн нь гадагшаа явах болсон тул арга буюу Асралтад өгчээ. Харин ч тэд "төөрсөөр төрөлдөө" гэсэн шиг сайн найзууд болсон байна. Учир нь тэд ихэнх хугацааг хамтдаа өнгөрөөдөг ба зуны зугаатай өдрүүдийг дугуйн дээрээ хамтдаа салхи татуулан өнгөрүүлж буй нь энэ. Хүү дугуйгаа унахдаа Цооцогийг дэргэдээ дагуулан гүйлгэхээр ядрах гээд байдаг тул үүрээд явах нь хэн хэндээ амар байдаг аж. 

Асралт хүү "Тэжээвэр амьтантай байх нь нэг талаараа хүнийг хариуцлагатай болгодог, нөгөө талаараа хүний хайрлан энэрэх чанарыг нэмдэг юм шиг санагддаг" хэмээсэн юм. Цооцог цаг ямагт яг л хүүхэд шиг хөөрнө, үүрүүлэх гэж яаран, үүргэвчиндээ дуртай нь аргагүй бараг үсрэн орно. Эзнийхээ нуруунд сая нэг үүрүүлчхээд яг л хүсэл нь биелсэн амьтан шиг "инээд алдаж" буй мэт аахилан, сортолзох нь хөөрхөн юм. 

Тэдний бичлэгийг үзэх бол ЭНД дарна уу. 

Гэрэл зургийг Б.Даваа