УИХ-ын Байгаль орчин, хүнс, хөдөө аж ахуйн байнгын хорооны Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий Ажлын хэсэг байгуулсан.

Уг ажлын хэсгээс Төрийн ордны “Их Эзэн Чингис хаан” танхимд өнөөдөр “Агаарын бохирдол-хүн амын эрүүл мэнд” (Амьд явах, эрүүл орчинд амьдрах эрх) сэдвийн хүрээнд хэлэлцүүлэг зохион байгуулж байна.

Хэлэлцүүлгийн зорилго нь мэдээлэл сонсох, цуглуулах аж.

“Хашаандаа сайхан амьдаръя” санаачилгын тэргүүн Ц.Түмэнбаяр:

-Судалгаагаа маш нарийн болгож, нотолмоор байна. Уушгины хорт хавдарт тамхи нөлөөлөөд байгаа юм уу, агаарын бохирдол нөлөөлж байна уу?. Судалгаа байхгүй учраас эрүүл мэндийн салбарынхан нотолж чадахгүй байна. Судалгаанд нь мөнгө, төсөв тавихгүй. Мөн эрх баригчид ирэх жил утаа шийднэ л гэдэг. Ингэж яриад байгаа учраас эмч нар маань нотолж чадахгүй байна.

Эхийн эндэгдэл гээд маш том асуудал байна. Ураг бүрэлдэж эхлэхээс л агаарын бохирдол нөлөөлж байна гэж байна шүү дээ. Үүнийг нарийвчлаад нэг, хоёр, эсхүл гурав дөрөвдүгээр сард нөлөөлөөд байна уу гэдгийг эрдэмтэн судлаачид нотолж, заавар зөвлөмж гаргах ёстой. Энэ ажлаа хийх боломжийг олгохгүй байна.

Судалгаа нь буруу байна, нэмээд авч хэрэгжүүлж байгаа бүх арга хэмжээ буруу. Яг эндээс бол ойрын 10 жилдээ утаа шийдэгдэхээргүй харагдаж байна. Тийм учраас 10 жил утаатай байвал эрүүл мэндийн яг ямар арга хэмжээ авах вэ?

Тиймээс нарийн зөвлөмжүүдийг эрүүл мэндийн байгууллагуудаас гаргах хэрэгтэй байна. Жирэмсэлье гэвэл хэдэн сард төрвөл тохиромжтой юм бэ. Нэг, хоёр жилийн дотор утааг шийднэ гэдэг худлаа амлалтаа боль, баталгаа нотолгоотой зөвлөмжийг иргэддээ өгье. Тэгэхгүй ирэх жил утаа шийднэ гээд ард түмнийг хордуулж, үхүүлээд байж болохгүй.

Ажлын хэсгийн дарга УИХ-ын гишүүн Ж.Чинбүрэн:

-Монгол Улсад өвчлөл судалдаг төв судлагдаад байгаа учраас чухал судалгаандаа мөнгө гаргаж чадахгүй, хийж чадахгүй зүгээр л судлаачдын идэвх санаачилга, олон улсын дэмжлэгээр хийж байна.