УИХ-ын хуралдааны шинэ дэгийн дагуу Ерөнхий сайдын цагийг асуулгын цаг болгон өөрчилсөн. УИХ-ын асуулгын цаг эхэллээ. Монгол Улсын парламентын түүхэнд анх удаа мэтгэлцээн зохион байгуулж буйг Ерөнхий сайд Г.Занданшатар онцлов.

Асуулт, хариултын хугацаа хоёр минут байна.

Ерөнхий сайд Г.Занданшатар УИХ дахь Ардчилсан намын бүлгийн дарга О.Цогтгэрэлийн асуултад хариулахдаа "Засгийн газар 100 хоногт унаж байсан эдийн засгаа сэргээлээ. Зургаадугаар сард 570 тэрбум төгрөгийн алдагдалтай байсан төсвийг өнөөдөр 52 тэрбумын ашигтай болголоо. Экспортын үнийг нэмэгдүүллээ. 

Унаж, живж байсан эдийн засгаа яаж сэргээх үү гэсэн хямралтай тулсан 100 хоногоо үдэж байна. Төсвийн тодотгол хийж батлаагүй бол валютын ханш 4000 төгрөгт, инфляц 15 хувьд хүрч болзошгүй байсан. Үр ашиггүй зардлуудаа танасан" гэв.

Нийгмийн дундаж давхаргыг бодсон бодлого баримталж байгаа эсэх асуултад Ерөнхий сайд "Төсөвт дундаж давхаргаа бодох бодлогын хүрээнд НӨАТ-ын буцаан олголтыг 2-5 хувь болгох замаар нийт НӨАТ төлөгчдийн 75-80 хувьд нь өгөөжтэй шинэ хэлбэрийг оруулж ирж байна.

Дөрвөн ам бүлтэй гэр бүл 2.5 сая төгрөг буцааж авах боломжтой. Нийт иргэдийн 80 хувь нь сард сая төгрөг хүртэл худалдан авалт хийж байна. 20 хувь нь чинээлэг хэсэг байж болно. Орлого багатай хэсгээ дэмжсэн төсөв болсон. Зөвхөн НӨАТ-аар жишээ авахад ийм. 

Цаашдаа цогц бодлогууд хэрэгжүүлнэ. 100 хоногт энэ бүгдийг өөрчлөх боломжгүй" гэлээ.

О.Цогтгэрэл: Баялгийн сангийн менежмент дээр ямар төлөвлөгөө байгаа вэ? Элдэв халамжийн сан эсвэл сонгуулийн өмнө мөнгө тараах хэрэгсэл болгоод байх юм уу?

Г.Занданшатар: Ирээдүй өв сан гэж нэрлэсэн энэ сан Норвегийн баялгийн санг тэр чигт нь хуулсан юм билээ. Норвеги бол баялгаараа бүх асуудлаа шийдсэн улс. Ийм хөгжингүй улсын жишээг аваад ирэхээр "ирээдүйдээ үлдээнэ" гэж л тодорхойлж байна.

Ийм учраас үүнийг шинээр томьёолж оруулж ирэхдээ "Одоо ба ирээдүйд" гэж би оруулж ирсэн юм. Ирээдүй өв сангийн мөнгийг гадаадад 3 хувийн хүүтэй байршуулаад байна. 

Дотооддоо орон сууцжуулалтын банкны эх үүсвэр болгож ашиглавал 6 хувиар өсөх төдийгүй хөрс, агаарын бохирдлоо шийдэх гарц болно. Түлш, зуухаар шийдэхгүй.  

ШУУД ҮЗЭХ: