Өмнөговь аймгийн иргэд “Цагаан дэл уул”, Борзонгийн говийг хамгаалахаар 33 мянган иргэний цахим гарын үсэг цуглуулж буй талаараа мэдээлэл өглөө.

Тодруулбал Засгийн газрын 2014 оны хоёрдугаар сарын 21-ний Цагаан дэл уул-Өлзий боомтыг нээх 46 дугаар тогтоолыг Үндсэн хуулийн 25 дугаар зүйлийн 2 дахь заалтыг зөрчин гаргасан гэв.

Цагаан дэл уулын боомт нээх талбай Монгол Улсын хилийн зурвас газарт болон улсын тусгай хэрэгцээний газар байрладаг аж. Өөрөөр хэлбэл Говийн бага дархан цаазат газраас 17 км-ийн зайд байхаар төлөвлөжээ.

Энэ дархан цаазат газар нь Өмнөговь аймгийн Хүрмэн, Номгон, Баян-Овоо, Ханбогд сумдын хилийн зааг газар нутаг болон Борзон, Заг сүүж, Зэмэр, Галба, Хармагтайн говиудын зарим хэсгийг хамардаг.
Энэ талаар нутгийн иргэд “Цагаан дэл уулаар авто замын боомт нээх асуудлыг Засгийн газар УИХ-д өргөн мэдүүлж, УИХ шийдвэрлэх байсан. Гэтэл Засгийн газар өөрийн чиг үүрэгт үл хамаарах асуудлаар шууд тогтоол гаргасан нь Үндсэн хууль зөрчиж байна. Иймд уг тогтоолыг хүчингүй болгуулахаар УИХ-ын дарга, Ерөнхий сайд нар хандаж байна.

Ерөнхий сайд Л.Оюун-Эрдэнэ 2022 онд Өмнөговийн Даланзадгад хотод 1000 орчим иргэнтэй уулзахдаа “Цагаан дэл уулаар боомт нээх үйл ажиллагааг түр түдгэлзүүллээ” гэсэн. Гэвч түүнээс хойш үйл ажиллагаа тасралтгүй үргэлжилсэн” гэв.

Энэ хүрээнд 33 мянган хүний гарын үсгийг цуглуулах ажиллагааг эхлүүлээд байгаа бөгөөд үүнд иргэдийг нэгдэхийг уриаллаа.

ДЭЛГЭРЭНГҮЙ ҮЗЭХ: