Үерийн эрсдлээс сэргийлэн Сэлбэ голын мод бургасыг зөөж шилжүүлэн, лаг хагшаасыг цэвэрлэх, үерийн даланг өргөтгөж, хүчитгэх ажлыг Улаанбаатар Захирагчийн ажлын албанаас эхлүүлсэн.

Дунд голын мод, бургасыг шилжүүлэн зөөвөрлөж байгаа ажлыг зарим иргэд шүүмжилж цахим хуудаснаа “Бургас буруугүй” гэж ч нийтэлсэн.  

Нийслэлийн Байгаль орчны газар болон холбогдох мэргэжлийн байгууллагуудаас нийслэлийн иргэдийн амь нас, эрүүл мэнд, эд хөрөнгийг үерийн аюулаас авран хамгаалахын тулд голын голдирол хааж, урсцыг боомилсон мод бургасыг нүүлгэн шилжүүлэх нь зөв гэсэн дүгнэлт гаргасан байна.

Өнөөдөр НОК-оос цаг үеийн асуудлаар мэдээлэл өгсөн бөгөөд энэ үеэр Улаанбаатар хотын Ерөнхий менежер бөгөөд Захирагчийн ажлын албаны дарга Ц.Төрхүүгээс Дунд голын бургасны асуудлаар мэдээлэл авав.

Тэрээр “1966-1975 онд Улаанбаатар хотын хэмжээнд нийт 24 км гар хийцлэл буюу шороон даланг хийсэн байдаг.

Мод, бут сөөг нь усны урсцыг удаашруулж, далангаа сэтэлж урсах нөхцөл байдал үүсгэдэг тул үерийн эрсдэлээс урьдчилан сэргийлэх үүднээс гол дотор буюу үерийн далан дотор ургасан бургасыг Хар усан тохой руу шилжүүлж байна.

Бургасыг шилжүүлснээр үерийн хамгийн эрсдэлгүй нөхцөл байдал үүснэ. Дунд голын бургас сэлбэ голын усны түвшин нэмэгдэж үерлэсний улмаас доторх бургасууд хугарсан. Тиймээс бид хугарсан бургас, насжилт ихтэй бургасыг гаргасан”  гэлээ.

-Шөнийн цагаар Сэлбэ голын лаг шаврыг зөөвөрлөж байна гэсэн мэдээлэл өгсөн. Мөн авто замын дагуу болон дээгүүр нь лаг, шавар болчихсон байдалтай байсан. Энэ асуудлыг хэрхэн шийдвэрлэж байгаа вэ?

-Нойтон лаг, шаврыг зөөвөрлөж байгаа юм чинь машины чиргүүлээс урсаж таарна. Тэр урссан лаг шаврыг тухай бүрд нь цэвэрлэж байгаа” гэсэн юм.

Гэрэл зургуудыг: Т.Бархас