-GoGo.mn сайт “Хаачих вэ” аяллын булангийн энэ удаагийн дугаарыг Тайвань орноос бэлтгэлээ-

Уламжлалт анагаах ухаан, орчин үеийн технологийн хослол. Энэ бол Тайванийн эрүүл мэндийн үйлчилгээ. Сүүлийн үед эрүүл мэндийн аялал жуулчлал буюу аялангаа биеэ оношлуулж, эмчлүүлэх хандлага нэмэгдэж байна.

Энэ хүрээнд Тайвань орныг зорьсных улсын болон хувийн эмнэлгийг нь харьцуулж үзэх зорилгоор хоёр эмнэлгээр орсон.

Тайванийн Эрүүл мэндийн яамны харьяа Тайпэй эмнэлэг 1972 оноос эхлэн үйл ажиллагаа явуулж байна. Онцлох үйлчилгээнүүдээс дурдвал өөрсдийн эмийн санд уламжлалт эм тан бэлтгэж хийдэг. 
Мөн сэргээн засах эмчилгээндээ ухаалаг робот ашигладаг. Тухайн хүний гэмтэл бэртэл ямар түвшинд байгааг тогтоож, түүнд нь таарсан дасгал хөдөлгөөнийг өвчтөнд сонирхолтой байдлаар хийлгэдэг.

Энэ эмнэлэг нь Олон улсын эрүүл мэндийн сургалтын төвтэй бөгөөд энэ төв Монголын эмнэлгүүдтэй хамтын ажиллагаатай. Мөн туршлага судлах, солилцооны хөтөлбөрүүдэд нь Монголоос олон эмч хамрагддаг гэсэн.

Chang Gung хувийн эмнэлэг 1978 онд үүсгэн байгуулагдсан. Тайванийн хамгийн том хувийн эмнэлэг бөгөөд Тайваньдаа долоон салбартай. Энэ эмнэлгийн үйл ажиллагаанаас онцлох нэг чиглэл нь протон эмчилгээний тасаг.

Протон эмчилгээний тасгийн хувьд тусдаа барилгад байдаг бөгөөд байгальд ээлтэй гэдгээрээ сайшаагддаг. Энэ нь Тайванийн хамгийн анхны, зүүн өмнөд Азидаа хамгийн том протон эмчилгээний төв юм.
Протон эмчилгээний 4 өрөөтэй, өдөрт дунджаар 70 гаруй хүн энэ эмчилгээнд ордог. Сүүлийн үед хавдрыг үр дүнтэй эмчлэхэд протон эмчилгээг ашиглаж буй. Хавдрыг эмчлэхдээ ойролцоох эрүүл эд эрхтнийг гэмтээх эрсдэл бага гэдгээрээ давуу талтай учраас өндөр хөгжилтэй орнууд ч энэ эмчилгээг ашиглах болсон.

Тайванийн виз бүрдүүлэхэд шаардлагатай материалуудыг ЭНД дарж харна уу.

Аяллын дэлгэрэнгүй бичлэгийг хүлээн авна уу.