Хүн худалдаалах гэмт хэрэгт хүүхэд өртөхөөс урьдчилан сэргийлэх, олон нийтийн мэдлэг ойлголтыг нэмэгдүүлэхэд чиглэсэн “Мөрөөдлийнхөө зүг” кампанит ажил үргэлжилж байна. Кампанит ажлын нээлт энэ сарын 11-ны өдөр болсон билээ.

"Даван туулагчийн түүх" баримтат уран сайхны киноны найруулагч, "Эрхэс" энтертайнмэнтийн найруулагч Б.Нарангэрэлтэй ярилцлаа. Энэхүү кино нь бодит үйл явдлаас сэдэвлэж буюу хүний наймаанд өртсөн эмэгтэйн түүхээс бүтсэн гэдгээрээ онцлог юм.

- Яагаад чухам энэ түүхийг сонгож бүтээл болгох болов?
- "Даван туулагчийн түүх" кино нь НҮБ-ын харьяа Олон улсын шилжилт хөдөлгөөний байгууллагын санхүүжилтээр бүтсэн уран бүтээл. Энэхүү сэдвийг сонгосон шалтгаан нь энэ төрлийн гэмт хэрэг маш ихээр гарах болсонтой холбоотой юм. Мэдээж энэхүү киноны зорилго хүмүүст анхааруулга өгөхөд чиглэнэ. Жишээ болгож хийсэн бодит үйл явдал өөрөө маш хүнд сэдэвтэй. Түүнийг нь харгалзаж энэ сэдвийг сонгосон. Манай багийнхан тухайн даван туулагчтай маш олон цагаар ярилцаж суусан юм. Ингэхдээ тэр хүн өнгөрсөн дэх хар бараан үйл явдалтайгаа эргэн "нүүр тулж", олон цаг бидэнтэй ярилцаж суух нь мэдээж хүнд байсан. Өдгөө тэр гэр бүлтэй болж, өнгөрснийг мартахыг хичээж байгаа хүн учраас тэр талын нууцлалыг маш өндөр хийх ёстой байсан. Хохирогчийг чухам юу туулсныг үзэгчдэд ойлгуулахын тулд энэхүү жанрыг сонгож авсан.

- Найруулагчийн хувьд тухайн үйл явдлыг бүтээлээрээ дамжуулж хүргэхээс гадна үзэгчдэд ойлгуулахыг хүссэн зүйл юу байсан бэ?
- Санхүүжүүлэгч, төрийн бус байгууллагууд болон төрийн байгууллагуудын гол зорилго нь хүн худалдаалах гэмт хэргээс олон нийтийг урьдчилан сэрэмжлүүлэхэд чиглэсэн. Ялангуяа итгэмтгий байдлыг нь ашиглаж охидыг хуурч хохирогч болгох тохиолдол өндөр байдаг. Энэ төрлийн гэмт хэргээс олон аргаар сэрэмжлүүлж болох ч бодит хүний туулсан түүхээр дамжуулж хүргэх нь илүү үр дүнтэй гэж бодсон.

“Мөрөөдлийнхөө зүг” кампанит ажлыг АНУ-ын Төрийн департаментын санхүүжилтээр Хууль зүй дотоод хэргийн яам, Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын алба, Гэр бүл, хөдөлмөр, нийгмийн хамгааллын яам, Дэлхийн зөн Монгол олон улсын байгууллага, Азийн сан, “Монгол Контент” ХХК хамтран хэрэгжүүлж байна.

#Мөрөөдлийнхөөзүг
#Өөдрөгамьдарөөрийгөөургуул
#Мэддэгмэдээлдэгбайя
#Бэлгийнмөлжлөгөөсурьдчилансэргийлье
#Тасланзогсооё
#Хамтдаадавантуулъя
#Хянамгайбайя

Хүн худалдаалах гэмт хэргийн талаарх өмнөх мэдээнүүдийг эндээс унших боломжтой.