УИХ дахь Ардчилсан намын бүлгийн өнөөдрийн /2025.06.16/ хурлаар "Үндэсний статистикийн хорооны" мэдээллийг сонслоо. Танилцуулга мэдээллийг Үндэсний статистикийн хорооны дарга Б.Батдаваа​ болон албаны хүмүүс танилцууллаа.

Мөн Х.Тэмүүжин нарын УИХ-ын 20 гишүүн 2025.05.30-ны өдөр өргөн мэдүүлсэн "Эрүүгийн хуульд нэмэлт, өөрчлөлт оруулах тухай" хуулийн төсөл болон хамт өргөн мэдүүлсэн хуулийн төслүүдийн талаар гишүүдэд мэдээлэл өгнө.

Бүлгийн хурлаас гарсан шийдвэрийг танилцуулж байна.

Бүлгийн дарга О.Цогтгэрэл "Хурлаар ҮСХ-ны мэдээллийг сонслоо. Иргэдийн бодит орлого 2019 оныхоос багассан байна. Мөн бүлэг эрчим хүчний салбарт үүсээд буй нөхцөл байдлын талаар мэдээлэл авах байсан. Энэ салбарт яаралтай нөхцөл байдал тулгараад байхад мэдээлэл хийх, ажил хариуцсан сайд байхгүй байна. Толорхойгүй байдлын улмаас мэдээлэл сонсож чадсангүй. 

Гуравдугаарт АН-ын бүлгээс шинээр томилогдсон Ерөнхий сайдад бүтцээ оруулж ирэхээс нь өмнө бодлогын шаардлага танилцуулъя, шинэ Засгийн газарт ямар шаардлага тавьж буйгаа танилцуулна. Бид гурван бүлэг шаардлага тавьж байгаа" гэв.

Мөн энэ үеэр УИХ-ын гишүүн Х.Тэмүүжин "Олон улсад Ерөнхий сайдыг нэр дэвшүүлэх эрх парламентын олонход байдаг. Манайд тэгээгүй. МАН-ын бүлгээсээ дэмжлэг аваагүй. Чуулган дээр өндөр хувиар гарсан байж магадгүй. 

Гэхдээ одоо Засгийн газрын кабинетаа байгуулж чадахгүй байна. Энэ хүн олонхоос нэр дэвшиж гарч ирсэн Ерөнхий сайд биш байна. Намын бага хурлаас дэвшиж гарч ирсэн хүн байна" гэв.