Монгол Улсын 32 дахь Ерөнхий сайд Л.Оюун-Эрдэнэ 2025 оны зургаадугаар сарын 3-ны өдөр огцорлоо. Тэрбээр өөрийн хүсэлтээр өөрт нь итгэл хүлээлгэх асуудлыг УИХ-д оруулж ирсэн бөгөөд уг тогтоолыг хэлэлцэн санал хураалт явуулсан юм.

Тодруулбал өнгөрсөн сард Ерөнхий сайд асан Л.Оюун-Эрдэний хүүгийн тансаг хэрэглээ олон нийтийг бухимдуулж, улмаар Ерөнхий сайдаас иргэд орлогоо нотлохыг шаардаж, "Огцрох амархан" жагсаал зохион байгуулсан. 

Тус жагсаалд Ардчилсан намын зарим гишүүд нэгдэж, гарын үсэг зурсны дараа МАН-ын бага хурлын ээлжит бус хурал болж, хамтарсан Засгийн газар байх эсэх асуудал яригдаж эхлэв. 

Үүний дараа Л.Оюун-Эрдэнэ өөрт нь итгэл үзүүлэх тогтоолын төслийг оруулж ирснийг Төрийн байгуулалтын байнгын хороо өчигдөр /2025.06.02/ хэлэлцэж, нууц санал хураасны дүнд олонх нь итгэл үзүүлэхийг дэмжсэн буюу УИХ-ын чуулганаар хэлэлцэх болсон юм. 

Чуулганы хуралдаанд санал хураалтад оролцсон 82 гишүүний 44 нь Ерөнхий сайдад итгэл үзүүлэхийг дэмжсэн бол 38 нь эсэргүүцсэн. УИХ-ын нийт гишүүдийн олонх буюу 64 гишүүн дэмжсэн тохиолдолд Ерөнхий сайдад итгэл үзүүлэх шийдвэр хүчинтэйд тооцогдох байв.

Ингэснээр Л.Оюун-Эрдэнэ огцорч ардчиллаас хойш Монголын улс төрийн түүхэнд хамгийн удаан хугацаанд Засгийн газрыг тэргүүлсэн Ерөнхий сайд болж үлдлээ.

Доорх инфографикаас ардчиллын үе буюу 1990 оноос хойш Ерөнхий сайдын албыг хашсан улс төрчдийг харна уу. /Зураг тус бүр дээр дарж дэлгэрэнгүй харах боломжтой/