УИХ-ын ээлжит бус чуулганы хуралдаан өнөөдөр (2024.08.15) эхэллээ.

Ээлжит бус чуулганаар “Монгол Улсын Засгийн газрын 2024-2028 оны үйл ажиллагааны хөтөлбөр батлах тухай”, “Зарим Байнгын хорооны бүрэлдэхүүнд өөрчлөлт оруулах тухай”, “Дэд хорооны бүрэлдэхүүний тухай” Улсын Их Хурлын тогтоолын төслүүд болон Зарим дэд хорооны даргыг сонгох тухай асуудлыг хэлэлцэнэ.

Чуулганы хуралдаанаар өнөөдөр 3 асуудал хэлэлцэнэ. Үүнд:

• “Монгол Улсын Засгийн газрын 2024-2028 оны үйл ажиллагааны хөтөлбөр батлах тухай” Улсын Их Хурлын тогтоолын төсөл /Засгийн газар 2024.08.12-ны өдөр өргөн мэдүүлсэн, яаралтай хэлэлцэх эсэх/
• Зарим байнгын хорооны бүрэлдэхүүнд өөрчлөлт оруулах тухай УИХ-ын тогтоолын төслийг хэлэлцэх
• Монгол Улсын Үндэсний аюулгүй байдлын зөвлөлийн мэдээлэл  сонсоно.

Хууль, тогтоолын төслийг яаралтай хэлэлцэх эсэх асуудлыг хэлэлцэж эхэллээ. Яаралтай хэлэлцэхийг дэмжье гэсэн саналын томьёоллоор санал хураалт явуулав.

Санал хураалтад 107 гишүүн оролцож, 84 хувь нь дэмжив. Улмаар “Монгол Улсын Засгийн газрын 2024-2028 оны үйл ажиллагааны хөтөлбөр батлах тухай” Улсын Их Хурлын тогтоолын төслийг яаралтай хэлэлцэхээр Төрийн байгууллагын байнгын хороонд шилжүүллээ.

УИХ-ын дарга Д.Амарбаясгалан УИХ-ын шинэ гишүүдийг санал хураалтын төхөөрөмжтэйгөө богино хугацаанд зөв харилцаж сурахыг зөвлөв.

Зарим байнгын хорооны бүрэлдэхүүнд өөрчлөлт оруулах тухай УИХ-ын тогтоолын төслийг хэлэлцэж эхэллээ.

• УИХ-ын гишүүн Б.Батцэцэг, У.Отгонбаяр нарыг УИХ-ын Боловсрол, соёл шинжлэх ухаан, спортын байнгын хорооны
• С.Лүндэгийг УИХ-ын Ёсзүй, дэгийн байнгын хорооны
• Б.Заяабал, Б.Уянга нарыг УИХ-ын Инноваци, цахим бодлогын байнгын хорооны
• Б.Жавхланг УИХ-ын Эдийн засгийн байнгын хорооны бүрэлдэхүүнээс тус тус чөлөөлөх.

Мөн:

• УИХ-ын гишүүн Д.Жаргалсайхан, С.Лүндэг, Б.Уянга нарыг УИХ-ын Аж үйлдвэржилтийн байнгын хорооны
• Б.Жавхланг УИХ-ын Ёс зүй дэгийн байнгын хорооны
• Б.Бат-Эрдэнийг УИХ-ын Нийгмийн бодлогын байнгын хорооны
• Б.Батцэцэг, Ж.Ганбаатар нарыг УИХ-ын Төсвийн байнгын хорооны
• Б.Заяабал, У.Отгонбаяр нарыг УИХ-ын Хуульзүйн байнгын хорооны
• Х.Ганхуягийг УИХ-ын Эдийн засгийн байнгын хорооны гишүүнээр тус тус батлах УИХ-ын тогтоолын төслийг УИХ-ын дарга Д.Амарбаясгалан уншиж танилцуулав.

Тогтоолын төслийг баталъя гэсэн томьёоллоор санал хураалт явууллаа. Санал хураалтад оролцсон 109 гишүүнээс 93 нь буюу 85 хувь нь дэмжсэнээр санал дэмжигдэв. Ийнхүү тогтоолын төслийг батлав. Тогтоолын эцсийн найруулгад санал хэлэх гишүүн байгаагүй тул үүнийг сонссонд тооцлоо.

Чуулганы хуралдаанаар Үндэсний аюулгүй байдлын зөвлөлийн мэдээллийг хаалттай сонсож байна.