Замбийн хөдөө нутагт амьдардаг нэгэн эмээ загварын ертөнцөд шуугиан тарьж, интернетийн од болжээ. Тэрээр загвар зохион бүтээгч ач охиныхоо зөвлөснөөр зураг авалтад оролцож, гайхалтай өөрчлөлтийг харуулсан нь түүнийг алдартай болгов.  

80 гаруй настай Маргарет Чола дэлхий дахинд тэр дундаа загварын ертөнцөд "Домогт Гламма" хэмээн алдаршиж, түүний өвөрмөц, өнгөлөг загварын зургуудыг Инстаграм дахь 225,000 дагагчид нь биширдэг.  

"Эдгээр хувцсыг өмсөхөд өөрийгөө өөр хүн мэт мэдэрч, өөр амьдралтай болсон мэт санагддаг. Өмнө хэзээ ч ийм мэдрэмжийг мэдэрч байгаагүй" хэмээн Маргарет BBC-д ярьжээ.   

Түүний энэхүү цуврал зураг авалтыг түүний ач охин Диана Каумба нь бүтээжээ. Нью-Йорк хотод амьдардаг загварын стилист Диана 2023 онд Замбид аавынхаа нас барсны хоёр жилийн ойд зориулан очихдоо энэхүү санаагаа олсон байна.  Аав нь үргэлж цэвэрхэн, дэгжин хувцаслаж, Дианагийн загварт хайртай болох эх үндсийг тавьсан байна.   Аавынхаа нутагт зочлох үеэр Диана өөртөө зориулж бэлдсэн хувцаснуудаа өмсөж амжаагүй тул эмээгээсээ тэдгээрийг өмсөж үзэхийг санал болгожээ.  

"Би тухайн үед хийх зүйлгүй байсан болохоор ач охин минь ингэхийг хүсэж байгаа бол хийе л дээ, яагаад болохгүй гэж бодсон. Ядаж л өөд болсны минь дараа намайг дурсах зүйл болох байх” хэмээн Маргарет ярьсан байна. 

"Чамин загварын хувцсаар эмээгээ гоёж, өөрийнх нь амьдардаг энгийн орчинд зургийг нь авбал сайхан харагдах байх гэж бодсон" гэж Диана BBC-д ярьжээ. Ихэнхдээ Маргарет тансаг модон сандал дээр сууж, эсвэл арьсан буйдан дээр налан байгальд зургаа авахуулдаг байна. Энэ энгийн орчин нь Замбийн нийслэл Лусакагийн хойд хэсэгт байрлах тосгоны ферм юм.

Эх сурвалж: BBC