Монгол Улсад атар газар эзэмшиж эхэлсний 65 жилийн ой энэ онд тохиож байна.

Мөн Хүнс, хөдөө аж ахуй, хөнгөн үйлдвэрийн яам Дархан хотод шилжсэнтэй холбогдуулан маргааш Дархан-Уул аймгийн Залуучуудын театрын гадна талбайд Алтан намар наадам болно. Наадамд Ерөнхийлөгч У.Хүрэлсүх оролцоно.

Энэ хүрээнд маргааш 16.00 цагаас Дархан хот дахь Хүнс, хөдөө аж ахуй, хөнгөн үйлдвэрийн яамны байранд Орос, Монголын хөдөө аж ахуйн “Орос ба Монгол Улс: Атар газар хамтран эзэмшиж эхэлсний 65 жил, хөдөө аж ахуй, аж үйлдвэрийн салбар дахь стратегийн түншлэл” уулзалт зохион байгуулна.

ОХУ-аас манай улс руу хөдөө аж ахуйн техник, тоног төхөөрөмж, хүнс, малын тэжээл, химийн бордоо нийлүүлэх чиглэлээр хоёр талын хамтын ажиллагааг хөгжүүлэх боломжийг хэлэлцэх аж.

Мөн ирэх арванхоёрдугаар сард Евроазийн эдийн засгийн холбоо, Монгол Улсын хооронд чөлөөт худалдааны тухай түр хэлэлцээрийг байгуулахаар товлосныг харгалзан Монголоос ОХУ руу мах, махан бүтээгдэхүүн, ноос, ноолууран бүтээгдэхүүн, арьс шир экспортлох боломжийг ч хэлэлцэнэ.

Чуулга уулзалтад Хүнс, хөдөө аж ахуй, хөнгөн үйлдвэрийн сайд Ж.Энхбаяр, Оросын Холбооны Улсаас Монгол Улсад суугаа Элчин сайд А.Н.Евсиков, ОХУ-ын Аж үйлдвэр, худалдааны яамны төлөөлөгчид, ОХУ-ын Буриад Улсын Тэргүүн А.С.Цыденов, Эрхүү мужийн Амбан захирагч И.И.Кобзев, Өвөрбайгалийн хязгаарын Хөдөө аж ахуйн сайд Д.Ю.Бочкарев болон Оросын хөдөө аж ахуй, хөнгөн үйлдвэрийн салбарын олон компанийн төлөөлөл оролцоно гэж ОХУ-ын ЭСЯ-наас мэдээлэв.