"Монголын сувилахуйн ирээдүйн хөгжил" сэдэвт сувилагчийн эмнэлзүйн ур чадварын шатлал /clinical ladder/-ыг ​сургалттай уялдуулан нэвтрүүлж, өргөжүүлэх сувилахуйн хоёр дахь удаагийн олон улсын симпозиум /10.29/ эхэллээ.

Уг симпозиумд  Монгол Улсын эрүүл мэндийн байгууллагуудын  Сувилахуйн албаны дарга, арга зүйч, ахлах сувилагч, сувилагч нар хамрагдаж, Японы болон дотоодын мэргэжилтнүүд сургалт орлоо.

Монгол-Япон эмнэлгийн /МЯЭ/ менежмент, эмнэлгийн ажилтны ​боловсролыг чадавхжуулах төсөл анх 2023 онд эхэлсэн ба 2027 он хүртэл үргэлжилнэ. Япон Улсын ЖАЙКА олон улсын байгууллага болон Монгол Улсын Боловсролын яам, Эрүүл мэндийн яам, АШУҮИС, Монгол-Японы эмнэлэг хамтран хэрэгжүүлж байна. 

"ХҮН ТӨВТЭЙ ЭМНЭЛГИЙН ТУСЛАМЖ ҮЙЛЧИЛГЭЭГ САЙЖРУУЛАХАД АНХААРНА"

ЖАЙКА олон улсын байгууллагын Монгол дах төлөөлөгчийн газрын дарга Мияги Кэнсүкэ хоёр дахь удаагийн олон улсын симпозиумыг нээж хэлсэн үгэндээ "ЖАЙКА олон улсын байгууллага нь Монгол Улсад эрүүл мэндийн үйлчилгээний чанарыг сайжруулах зорилгоор анх удаа их сургуулийн эмнэлэг буюу Монгол-Японы эмнэлгийг Япон улсын Засгийн газрын буцалтгүй тусламжаар байгуулж, одоогоор үйл ажиллагаа, менежмент, эмнэлгийн тусламж үйлчилгээг сайжруулахад анхааран ажиллаж байна.

Сувилагч мэргэжил бол Монгол улсын хувьд маш өндөр ач холбогдолтой гэж АШУҮИС-ийн Ректор Б.Дамдиндорж дурдаад тэр дундаа сувилахуйн тусламж үйлчилгээг сайжруулах нь чухал хэмээсэн.

Тиймээс ЖАЙКА сувилахын салбарт олон төсөл хэрэгжүүлж, хамтын ажиллагааг өргөжүүлж ирсэн. Түүний нэг нь 2024 онд хэрэгжиж дууссан эмч, сувилагч, эх баригчдын ур чадварыг сайжруулах төсөл бөгөөд үүний үр дүнг үргэлжлүүлж МЯЭ-ийн төсөл дээр сувилагчийн эмнэлзүйн ур чадварын шатлалыг нэвтрүүлж, ажлын байран дээр сургалтыг сайжруулж, хүн төвтэй эмнэлгийн тусламж үйлчилгээг нэвтрүүлэх зэрэг сувилахуйн тусламж үйлчилгээтэй холбоотой олон арга хэмжээг хэрэгжүүлж байна" гэсэн юм. 

"МОНГОЛ-ЯПОНЫ ЭМНЭЛЭГТ СУВИЛАГЧИЙН УР ЧАДВАРЫН ШАТЛАЛЫГ НЭВТРҮҮЛЛЭЭ"

АШУҮИС-ийн Монгол Японы эмнэлгийн Сувилахуйн албаны сургалт хөгжил хариуцсан менежер Г.Лхамаа:
Монгол Японы эмнэлэг маань ашиглалтад орсон цагаасаа эхлэн Япон менежментээр сувилахуйн тусламж үйлчилгээг хөгжүүлж, шинэ технологи, шинэ сургалтын арга барилыг нэвтрүүлэхээр байнгын харилцаа холбоотой ажилладаг.

Эмч, сувилагч нарын төгсөлтийн дараах сургалтын сайжруулах төслийн хүрээнд Япон улсын Эхимэ Их Сургуулийн сувилахуйн менежменттэй танилцахаар манай сувилахуйн баг явсан. Тэндээс олон зүйл сурч мэдсэний дундаас сувилагчийн эмнэлзүйн ур чадварын шатлал /clinical ladder/-ыг хөгжүүлэх нь зүйтэй гэж үзсэн. Япон улс тэр дундаа Эхимэ Их Сургууль нь зургаан түвшинд хэрэгжүүлж байсан.

Ер нь энэхүү шатлалыг нэвтрүүлснээр сувилагч нар маань тасралтгүй өсөж, хөгжиж мэргэжлийн хувьд сайжрах үр дүнтэй юм. Манай эмнэлэг дээр 2025 оноос эхлэн нэгдүгээр шатлалын үнэлгээг хийгээд эхэлсэн ба нийт зургаан шатлал бий. Эхний шатлалд тэнцсэн сувилагч нар маань хоёр дахь шатлал руу ирэх жилээс шилжих, удаах жилд гурав дахь шатлал руу өгсөх гэх мэт ажлуудыг хийхээр төлөвлөөд байна. ЖАЙКА олон улсын байгууллагатай хамтраад сургалтыг зохион байгуулдаг.

Мэдээж энэхүү менежментийг монгол "хөрсөнд" буулгаж нэвтрүүлэхээс эхлээд, бусад эмнэлгийн эмч, сувилагчдад туршлагаа хуваалцан, тулгамдаж буй асуудлаа хэлэлцээд, Монгол Улсад сувилагч нар маань эмнэлзүйн ур чадварын шатлалаараа хөгжих боломжтойг өнөөдрийн арга хэмжээгээр хуваалцаж байна" гэлээ. 

"СУВИЛАГЧ ӨӨРИЙГӨӨ ТОГТМОЛ ХӨГЖҮҮЛЖ БАЙХ ШААРДЛАГАТАЙ"

Өөрийн туршлага, онол практикийн мэдлэг, мэдээллээ харамгүй хуваалцаж буй олон япон мэргэжилтэн уг төслийн хүрээнд манай улсад хүрэлцэн иржээ.

Тэдний нэг Япон улсын Эхимэ Их Сургуулийн эмнэлгийн дэд захирал Сакита Сатоми "Өнгөрсөн жилийн симпозиум нь Япон дахь клиникийн шатлал буюу хүний нөөцийн шаталсан сургалтыг хэрхэн явуулдаг, түүний онцлог юу вэ гэдэг дээр төвлөрч байсан бол энэ удаагийн симпозиум нь илүү гүнзгийрүүлсэн буюу шатлалыг бий болгосноороо хүний нөөцөө хөгжүүлэх, боловсрол, сургалтуудаа хэрхэн явуулах вэ зэрэг практикт илүү чиглэж байна.

Сувилагч мэргэжилтэй хүн байнга өөрийгөө хөгжүүлж, мэрийлттэй байх шаардлагатай гэж боддог. Тиймээс энэхүү үйл ажиллагааг нэвтрүүлснээр Монголын сувилахуйн хэрэгцээ, чадвар өсөж, олон нийт ч сувилагч мэргэжлийг харах өнцөг өөрчлөгдөж, үнэ цэн нь нэмэгдэж, нэг үгээр бусдад хүлээн зөвшөөрөгдөх хүртлээ өөрсдийгөө хөгжүүлэхэд хувь нэмрээ оруулах болно. Өөрөө өөрийгөө сургаж, чадавхжуулахад сургалтын дэмжлэг маш чухал байдаг." гэсэн юм.