Бамбай хоншоорт болон бусад төрлийн могойд хатгуулах тохиолдол, урьдчилан сэргийлэх зөвлөмжийн талаар Гэмтэл согог судлалын үндэсний төв /ГССҮТ/-өөс мэдээлж байна.

ГССҮТ-ийн Түлэнхийн төвийн эрхлэгч Ц.Нарантунгалаг "2024 оны байдлаар могойд хазуулсан 6 хүн манай төвд хэвтэн эмчлүүлсэн. Энэ жил найман хүн хэвтэн эмчлүүлсэн. Үүнээс зургаа нь хүүхэд байна. Зайлшгүй хэвтэн эмчлүүлэх шаардлагатай, хавдар ихтэй, хордлогын шинж ихтэй хүнийг бид хүлээн авч, хэвтүүлэн эмчилдэг.

Тухайн хүнийг ямар могойд хазуулсан байна гэдгийг мэдэхэд бэрх. Хазсан могойг нүдээрээ харсан ч хүн байна, хараагүй ч хүн байдаг. 

Хортой могойд хазуулсан бол гол төлөв хаван, хавдраар эхэлдэг. Дараа нь хөхрөлтөөр үргэлжилдэг. Хэрэв хазуулсан бол амаар хорыг сорж болохгүй. Халуун, хүйтэн жин тавьж болохгүй. 

Могойд хазуулсан бол нэн түрүүнд тухайн газраас холдох хэрэгтэй. Бага насны хүүхдийг хараа хяналтгүй орхиж болохгүй. Өвс их ургасан газар түрийтэй гутал өмсөх хэрэгтэй. 

Хазуулсан хэсгийг аль болох хөдөлгөөнгүй, зүрхнээс доош байрлалд байлгана. Ингэхдээ чиг тавьж болно. Мөн шингэн зүйл сайтар уух шаардлагатай. Эмнэлгээс хол байгаа бол хазуулсан хэсгийг усаар угааж, цэвэр зүйлээр боож болно. 

Хор биеэр тархсан бол ямар ч эрхтэн гэмтэхийг үгүйсгэхгүй. Мөн маш ховор тохиолдолд цус задрах тохиолдол үүсдэг. Гэхдээ үүнээс болж хүний амь эрсдэж байсан тохиолдол байхгүй. 

Хазуулаад хэр хугацаанд бүрэн эдгэрэх нь тухайн хүний биеийн онцлог, байдлаас хамаарна. Гол төлөв ахмад настан болон хүүхдүүд хүндрэх эрсдэлтэй" гэлээ.

Саяхан нэг настай хүүхэд могойнд хатгуулсан талаар тодруулахад ар гэр нь мэдээлэл өгөхөөс татгалзсан тул тус хүүхдийн талаар мэдээлэл өгөх боломжгүй гэсэн юм.