УИХ-ын чуулганы үдээс хойших чуулганы хурлаар “Батлан хамгаалахын техник, тоног төхөөрөмж болон технологи шилжүүлэх тухай Монгол Улсын Засгийн газар, Япон Улсын Засгийн газар хоорондын хэлэлцээр”-ийг соёрхон батлах тухай хуулийн төслийг хэлэлцэж байна.

Хэлэлцэж буй асуудалтай холбоотойгоор С.Ганбаатар гишүүн асуулт асуусан. Тэрбээр Японоос орж ирэх тоног төхөөрөмжүүд буцалтгүй тусламж юм байна. Бэлгийн морины шүдийг үздэггүй гэдэг ч эдгээр төхөөрөмжийн зах зээлийн үнэ нь хэд вэ? Дараа нь урсгал зардал, засвар, үйл ажиллагааны зардлын тооцоог хийсэн үү гэсэн юм. 

Үүнд Батлан хамгаалахын сайд С.Бямбацогт, Бид дэлхийн 39 улстай батлан хамгаалахын салбарт хамтын ажиллагаатай. Япон улстай цэрэг, техникийн хамтын ажиллагаатай болох хэлэлцээр байгуулж байна. Тодорхой үнийн дүн, зориулалт бүхий тоног төхөөрөмжийг буцалтгүй тусламжаар авч байна. Ямар үнийн дүнтэй гэдэг нь улсын нууцад ордог юм билээ. Шаардлагатай гэвэл албан бичиг гаргаж өгч болно. Эдгээр нь Батлан хамгаалахын салбарт хэрэгтэй төхөөрөмжүүд. Нэмэлт зардал гарахгүй гэв. 

П.Сайнзориг гишүүн: Зарчмын хувьд дэмжиж байна. Хэлэлцээрийг соёрхон батлах хүрээнд Монгол Улсад мэдлэг ноу-хау орж ирж байна гэж ойлгож байна. Бодлогын хүрээнд хуучин цагийн гэхээс илүү орчин цагийн техник технологитой харьцаж чадах боловсон хүчнийг бэлтгэхэд ямар төсөөлөлтэй байгаа вэ? Залуучууд цэрэгт очоод ямар давуу талтай болоод халагдах вэ? Цэргийн алба хаангаа ямар салбаруудаар мэргэших бололцоог бүрдүүлж байна вэ? 

С.Бямбацогт сайд: Бид дэвшилтэт техник технологийг ашиглах, зэвсэг техникээ шинэчлэхэд анхаарч байна. Үүнийг хугацаат цэргийн албан хаагчаас эхэлж байгаа. Цэргийн алба хаагч бие сэтгэлийн хувьд хатуужихаас гадна, амьдралаа авч явах олон чадвартай болох ёстой. Энэ жилээс англи хэл, мэдээллийн технологийн анхан шатны мэдэгдэхүүн, чадвартай болгох шийдлийг хэрэгжүүлж байна.

Чуулганы хуралдаан шууд үзэх: