"Улаанбаатар-бүсчилсэн хөгжил" форумын талаар Нийслэлийн Засаг даргын нэгдүгээр орлогч П.Сайнзориг мэдээлэл өгч байна.

Монгол Улсын Засгийн газраас 2024 оныг Бүсчилсэн хөгжлийг дэмжих жил болгон зарласан. Энэ хүрээнд бүсчилсэн хөгжлийн үзэл баримтлалыг шинэчлэх асуудал хэлэлцүүлгийн шатанд явж байна. 

Иймд "Улаанбаатар-бүсчилсэн хөгжил" форумаар хэрхэн хотын хөгжлийн загвараа сонгох, нөөц бололцоогоо ашиглах, бусад аймаг бүсүүдтэй хамтарч ажиллах зэргийн талаар хөндөнө гэдгийг П.Сайнзориг орлогч хэллээ. 

Мөн нийслэл хот есөн дүүрэгтэйгээр цаашид үргэлжлэх эсэх асуудал яригдаж байгаа гэв. Тэрбээр, Зарим дүүрэгт 5000 хүрэхгүй оршин суугчтай байхад заримд нь 435 мянга гаруй хүн амьдарч байна. Үүний улмаас төрийн үйлчилгээ авахад урт дараалалт, хүнд суртал үүссэн. 

Тэгэхээр цаашид энэ загвараар явах нь Улаанбаатарын нийгэм, эдийн засгийн асуудалд хэрхэн нөлөөлж буйг дүгнэж ярилцах зорилготой. 

Хоёрдугаарт, Төв аймагтай интеграцид орох буюу дагуул хотын асуудал нэн тэргүүнд хөндөгддөг. Улаанбаатар хотын хөгжлийн асуудлыг дагуул хотын концепциор авч үзэн, ярилцах төлөвлөгөөтэй байна. Дагуул хот нь шинэ ажлын байр, бизнес, татвар төлөгчдийг бий болгох давуу талтай. 

Гуравдугаарт хотод хамгийн ихээр тулгамдаж буй дэд бүтцийн дутагдал, хоцрогдлын асуудлыг хэлэлцэнэ. Энэ бол яалт ч үгүй эдийн засгийг боомилж буй хүчин зүйлсийн нэг. Орон сууц барья гэхээр эрчим хүч, дулааны асуудал яригддаг. Дөрөвдүгээрт, хүнсний асуудал байна. 

Энэ мэтчилэн дөрвөн гол агуулгын хүрээнд форумын үеэр ярилцана. Ингэхдээ хувийн хэвшлийн оролцоог нэмэгдүүлж, төр, хувийн хэвшил хамтарч ажиллах зарчмаар шийдлүүдийг гаргаж ирнэ гэв.