Ерөнхийлөгчийн зарлигаар Биеийн тамир, спортын салбарт үр бүтээлтэй ажиллаж, амжилт гарган төрийн дээд цол хүртсэн гавьяат тамирчин, дасгалжуулагчдад шагнал гардуулж байна.

Ёслолд Монгол Улсын сайд, олимп, нийтийн биеийн тамир, спортын Үндэсний хорооны дарга Б.Бат-Эрдэнэ, Монгол Улсын Ерөнхийлөгчийн Тамгын газрын дарга Я.Содбаатар,  Монгол Улсын Ерөнхийлөгчийн зөвлөх С.Мөнхсайхан, Засгийн газрын тохируулагч агентлаг–Биеийн тамир, спортын улсын хорооны дарга Д.Жаргалсайхан, Монголын үндэсний олимпын хорооны тэргүүн дэд ерөнхийлөгч Ч.Наранбаатар нар оролцож, Монгол Улсын гавьяат цол, одон хүртсэн эрхмүүдэд баяр хүргэв.

Гавьяат дасгалжуулагч цолоор:

• Г.Батмөнх, С.Хөхөө, Д.Мягмар, Д.Норолхоо

Гавьяат тамирчин цолоор:

• Р.Алданыш, Д.Цолмон, Б.Чимэдцэрэн

Алтан гадас одонгоор:

• Ч.Март, З.Занабазар, Н.Наранхүү, Б.Хулан нар шагнуулжээ.

Олимп, нийтийн биеийн тамир, спортын Үндэсний хорооны дарга Б.Бат-Эрдэнэ "Засгийн газраас бие тамир, спортын салбарт онцгойлон ач холбогдол өгч байгаа. Улс, орныхоо нэрийг өндөрт өргөж, амжилт гаргахын зэрэгцээ, спортоор дамжуулан хүн, ардад эрүүл, итгэлтэй амьдралын хэв маягийг бий болгож нийгэмд эерэг нөлөөллийн үйл ажиллагаа явуулахад манлайлах үүргийг бид авсан.

Тийм учраас манай салбарын тамирчин, судлаач, мэргэжилтнүүд энэ их өндөр үүрэг хариуцлагыг богино хугацаанд, үр дүнтэй биелүүлж ажиллана гэдэгт бүрэн дүүрэн итгэлтэй байна" гэлээ.