Монгол Улсын 2025 оны төсвийн тухай, Нийгмийн даатгалын сангийн 2025 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төслүүдийн хоёр дахь хэлэлцүүлгийг өчигдөр хийж, гурав дахь хэлэлцүүлэгт бэлтгүүлэхээр Төсвийн байнгын хороонд шилжүүлсэн. Хуулийн төслүүдийн гурав дахь хэлэлцүүлгийг хийж байна.

УИХ-ын гишүүн С.Цэнгүүн:

-Төсвийн ажлын хэсэгт би орж ажилласан. 2025 оны төсөвт эрчим хүчтэй холбоотой мэдээллийг олон нийтэд хэвлэл мэдээллийн хэрэгслээр дамжуулан түгээх зардал гэж 9 тэрбум төгрөг суулгасан байсныг хасуулсан. Т.Доржханд гишүүнээс асууя, энэ зардлыг яагаад Эрчим хүчний үндэсний хорооны гишүүдэд мэдэгдэлгүй тавьсан бэ. Эрчим хүчний үндэсний хороо 6 гишүүнтэй. Надаас бусад 6 гишүүн ямар ч мэдээлэлгүй байхад энэ төсөв тавигдсан байсан. Өөр том төсөв бий юу гэж асууя.

УИХ-ын гишүүн Т.Доржханд:  

-Эрчим хүчний шилжилт хийнэ гэдэг ажлын хүрээнд Эрчим хүчний үндэсний хороонд УИХ-ын гишүүд, гурван намын төлөөллүүд багтсан. Үүний нэг нь С.Цэнгүүн гишүүн. Энэ гишүүний хувьд ямар нэг ашиг сонирхол байхгүй, чин сэтгэлээсээ ажилласан. Хэвлэл мэдээлэлд их зардал тусгасан тухай буруу мэдээлэл явсан. Үүнд 1.2 тэрбум төгрөг энэ онд суусан байна, үүнийг С.Цэнгүүн гишүүн тараагаад явж байна гэх мэдээлэл явсан. Энэ бол худал мэдээлэл. Нэг ч төгрөг гараагүй, Сангийн яам дээр хүлээгдэж байгаа шүү.

УИХ-ын гишүүн Л.Мөнхбаатар:

-Энэ танхимд сууж байгаа гишүүд бид нэг төсвөө хоёр батлах гэж буй түүхэн хүмүүс болох гэж байна.  Нөхцөл байдлаа анхаарч үзэхгүй бол болохгүй нь. Улстөрчид учраа мэдэж улстөрөө хийхгүй бол улс орныхоо хөгжлийг хязгаарласан нөхцөл байдал руу орж байна. Улс, орны бодлого улстөрчдийн лайк, шэйрийн өмнө өвдөг сөгдөөд байж болохгүй. Төсөв бол хөгжлийн бодлого, түлхүүр гэдгийг хаа хаанаа анхаараарай гэж хэлье.