Засгийн газрын ээлжит хуралдаан үргэлжилж байна. Өнөөдрийн хурлаар

• Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төсөл,
• “Газрын тос боловсруулах үйлдвэр барих төсөл”-ийн нэмэлт санхүүжилтийн Зээлийн хэлэлцээрийн тухай,
• Нийслэл Улаанбаатар хотын агаар, орчны бохирдлыг бууруулах арга хэмжээний тухай хуулийн төсөл,
• Нийслэл Улаанбаатар хотын 2040 он хүртэлх хөгжлийн ерөнхий төлөвлөгөө батлах тухай” Улсын Их Хурлын тогтоолын төсөл,
• Төрийн өмчит компаниудын 2025 оны бизнес төлөвлөгөө, төсвийн төлөвлөгөө зэрэг 30 гаруй асуудал хэлэлцэж байна.

Засгийн газрын хуралдаанаас гаргасан шийдвэрийг Н.Учрал гишүүн танилцуулж байна.

Тэрбээр, Төрийн өмчит компаниудын бүтээмж, засаглал, ил тод байдлыг сайжруулах тухай хуулийн төслийг УИХ-д өргөн мэдүүлэхээр шийдвэрлэсэн. 

Энэ хуулийн хүрээнд Төлөөлөн удирдах зөвлөлийг хараат бус байлгах зарчмыг хангуулахын тулд ТУЗ-ийн гишүүд, гүйцэтгэх захирлуудын босго шаардлага сайжруулах нөхцөл бүрдүүлэх, төр ямар тохиолдолд төрийн өмчит компаний байгуулахыг хуульд хатуу суулгаж өгч байна. Ингэснээр таван чиглэлээр л төрийн өмчит компанийг байгуулна. Уул, уурхай, эрчим хүч, банк санхүү, зам тээвэр, бусад гэсэн үндсэн салбартай болно.

2023 оны байдлаар төрийн өмчийн 122 компани тайлангаа ирүүлсэн. Эдгээр компанийг төрийн өмчийн корпорац буюу хөрөнгийн менежмент хийдэг статустай болгоно. 

122 компани 56 болох тооцоолол гарсан. Үр дүн нь төсвийн хэмнэлтээс мэдрэгдэх бөгөөд давхардсан чиг үүргүүдийг арилгана гэв.

Мөн цаашид ашиг, орлогогүй ажиллах төрийн өмчийн компаниуд байхгүй болно гэдгийг онцолсон.

Тус хуулийн төсөлд төрийн болон орон нутгийн өмчит компани хариуцлага, эрх, үүргийн хувьд улс төрийн нөлөөллөөс ангид, хараат бус байх, үр ашигтай байх, хараат бус хөндлөнгийн хяналттай байх, компанийн үйл ажиллагаа ил тод байх, компани төр, эсхүл орон нутгийн хүлээх үүргийг хариуцахгүй байх зарчмыг тусгажээ.

Мөн төр, орон нутаг эдийн засгийн тооцоо, судалгаагүйгээр хувийн хэвшил гүйцэтгэх боломжтой салбарт компани үүсгэн байгуулах боломжгүй болно. Ингэснээр хувийн хэвшил хийх боломжгүй, ашиггүй, төрөөс үзүүлэх зайлшгүй шаардлагатай үйлчилгээ буюу нийтийн зориулалттай дэд бүтэц, нийтийн үйлчилгээний салбарт төрийн болон орон нутгийн өмчит компани байгуулах зэргийг тусгасан байна.