УИХ-ын чуулганы үдээс хойших хуралдаан үргэлжилж, Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэж байна. 

Хэлэлцэж буй асуудалтай холбоотойгоор гишүүд асуулт асууж, хариуллаа. 

УИХ-ын гишүүн А.Ариунзаяа: Уг хуулийн төслийг зарчмын хувьд дэмжиж байна. Хуулийн 27.2.3-т Албан татвар, төлбөр хураамж тогтоосон харилцааг зөвхөн хуулиар буюу УИХ-аар зохицуулна гэдэг заалт хэрэгжих боломжтой юу? Бүх төлбөрийг хэлэлцэнэ гэхээр цаг хугацааны хувьд ч биелэх боломжтой юу? 

Мөн хууль хэрэгжихгүй байгаа тал дээр бид яах ёстой вэ? "Монголын хууль гурван хоногт" гэдэг хэллэг миний ойлгодгоор Чингис хааны үеэс эхлэн хууль батлагдмагц Монгол Улсын бүх өнцөгт гурав хоногт багтан хүрдэг байсан гэж ойлгодог. Гэтэл одоо хууль батлагдлаа, гурав хоног хэрэгжээд байхгүй болчихдог гэдэг ойлголттой боллоо. 

Хамгийн ойрын жишээ гэвэл Хөдөлмөрийн хөлсний доод хэмжээний тухай хууль байна. Хуулийн 5.4-т хоёр жилд нэг удаа тогтооно, 7.2-т нэгдүгээр сарын 1-нээс эхлэн мөрдөнө гэж заасан байдаг. Гэтэл гурван жил дараалан хөдөлмөрийн хөлсний доод хэмжээг нэмлээ, дөрөвдүгээр сарын 1-нээс эхлэн хэрэгжлээ.

УИХ-ын гишүүн М.Энхцэцэг: Манай хуулиуд ер нь маш ерөнхий, товч байдаг юм билээ. Үүнээс болоод маш олон журам бий болж гардаг. Тухайлбал Эрчим хүчний тухай хууль байна. Зургаахан бүлэг, 18 хуудастай. Гэсэн хэр нь дулаан, цахилгаан гэсэн хоёр том салбарын харилцааг зохицуулдаг хууль. 

Ийм ерөнхий хуультай байснаас болоод энэ хоёр салбар 800 гаруй журмаар харилцаагаа зохицуулж байна. Манайхтай ижил Казахстан, Эстони зэрэг улсууд бие даасан дулаан, цахилгааны хуультай байна. Дулааны хууль нь л гэхэд дор хаяж 5-10 бүлэгтэй. Эдгээр орнууд бидний журмаар зохицуулаад байгаа харилцааг хуулиараа зохицуулж байна. Ингэж байж хууль тогтоомжийн тогтвортой орчин тэнд бүрдэж байна.