УИХ-ын гишүүн Ч.Лодойсамбуу, Б.Түвшин болон бусад гишүүд УИХ-ын даргад Нийгмийн даатгалын ерөнхий хуульд нэмэлт өөрчлөлт оруулах хуулийн төсөл өргөн барьсан талаараа мэдээлэл өгч байна. 

Олон удаагийн хэлэлцүүлэг хийсний үр дүнд 41 гишүүн гарын үсэг зурснаар уг хуулийн төслийг УИХ-ын даргад өргөн барьжээ.

Энэ талаар УИХ-ын гишүүн Б.Түвшин "Ажлын байр, иргэдийн бодит орлогыг нэмэгдүүлэх, ажил олгогчийг ажлын байраа нэмэгдүүлэх сэдлийг нь хангах гэсэн гурван үндсэн заалт бий. 

Нэгдүгээрт Нийгмийн даатгалын ерөнхий хуульд байдаг зохицуулалтаас Иргэний хуулийн зохицуулалтын хөдөлмөрийн шинж чанартай зүйлээс албан журмын нийгмийн даатгал авдгийг болиулъя гэсэн заалт байна. Иргэн ажил хөдөлмөр гүйцэтгэхдээ орлогоосоо 20 хүртэлх хувийн нийгмийн даатгал төлж байгаа нь ажилгүйдлийг ихэсгэх, ажлын байрны үр ашгийг багасгах, энэ чиглэлээр хувиараа хөдөлмөр эрхлэгчдийг боймлох арга хэмжээ болж байна гэж үзэж байна. 

Хоёр дахь заалт нь хоол, унаа, байрны ашиглалтын зардлын хөнгөлөлт зэргээс нийгмийн даатгал авдгийг болиулах. Энэ нь бодит орлогыг нэмэгдүүлэх, ажил олгогчид ажилчдадаа бодит хөнгөлөлт дэмжлэг үзүүлэх сэдлийг төрүүлэх үр дүнтэй гэж үзэж байна. 

Гуравдугаарт, байгууллагаас төлдөг нийгмийн даатгалын албан журмын хэмжээг хөдөлмөрийн хөлсний доод хэмжээг 10 дахин нэмэгдүүлсэн хэмжээгээр хязгаар тогтоох. Ингэснээр байгууллагын үр ашиг, ажлын байр нэмэгдүүлэх боломж олгоно гэж үзэж байна" гэв.

УИХ-ын гишүүн П.Ганзориг “Хувийн хэвшлүүд татвар, зээлийн хүү гэх мэт олон төрлийн дарамтад үйл ажиллагаа явуулж байна. Ажил олгогчийн төлдөг НДШ-ийн хөнгөлөх, тогтмол ордог орлого буюу цалингаас бусад төрлөөс нь НДШ давхар авдаг байсныг болиулж байгаа гэх мэт ач холбогдол өндөртэй хуулийн төсөл. 

Хөлсөөр ажиллах гэрээ, ажил гүйцэтгэх гэрээнээс авдаг НДШ-ийг болиулж байгаа. Үүний үр дүн Монгол Улсад үйл ажиллагаа явуулж буй бүх аж ахуйн нэгжид очно" гэлээ.