Ерөнхийлөгч У.Хүрэлсүх өчигдөр УИХ, Засгийн газрын гишүүд болон Тавантолгой түлш компанийн удирдлагуудыг дуудаж, агаарын бохирдлыг бууруулах ажлын талаар мэдээлэл сонсож, утааг бууруулах үүрэг чиглэл өгөв.

Энэ үеэр тэрээр "Ерөнхий сайд хүндэтгэх шалтгаантай байсан тул ирж амжаагүй байна. Гэхдээ байсан бол зүгээр байх байлаа. Холбогдох гол сайд нар байгаа учраас чиглэл болон санасан бодсоноо хэлье. Нэгдүгээрт Засгийн бүтэц зохион байгуулалтад өөрчлөлт орсон. Сайд нар ажлаа аваад удаагүй байгаа ч ажлаа хийгээд эхэлчихсэн шүү.

Төрийн хамгийн чухал ажил бол хяналт шалгалт байдаг юм

Бүх юм нь салан задгай, бие биедээ шаардлага тавихгүй. Найраан дундаа ороод найрааны Засгийн газар болчих юм байна л даа. Тийм юм байхгүй шүү. Ажлаа хийцгээ. Гаргасан амжилтаасаа яагаад ухраад байгаа юм? Гурван жил утаагүй байсан. Яагаад ийм нөхцөл байдалд орчхов?

Цар тахлын үед бүх хүмүүс гэртээ өдөржин галаа түлдэг байсан. Гэтэл өнөөдрийн асуудал бол нүүрсний утаа, хариуцлагагүй байдлын утаа хавсраад Улаанбаатарын утааг бий болгож, бүрхэж байгаа юм.  

Тавантолгой түлшийг шалгаж байгаа биз дээ. Танайх хатаалтаа сайн хийхгүй байгаа юм. Ажил хийхгүй арчаагүй гаруудыг зайлуул.  

Агаар орчны бохирдлыг бууруулах үндэсний хороо татан буугдсан. Яагаад татан буугдчихсан юм бэ? Мэргэжлийн хяналтын газраа мөн татан буулгачихсан. Давхар хяналт шалгалт гэж байхгүй болгочихсон. Төрийн хамгийн чухал ажил бол хяналт шалгалт байдаг юм. Агаарын бохирдлыг бууруулах үндэсний хороог байгуулаг шаардлагатай, засгийн газрын хуралдаанаар хэлэлцэх үүргийг өгч байна. Агаарын бохирдлыг Тавантолгой түлш болон Нийслэлд даалгана гэвэл эд нар хэзээ ч амжилтад хүрэхгүй" гэв.