УИХ-ын чуулганы өнөөдөр /2024.12.27/-ийн хуралдаан эхэллээ. Хурлаар хэлэлцэх асуудлууд: 

• “Монгол Улсын Засгийн газар, Бүгд Найрамдах Хятад Ард Улсын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай” Улсын Их Хурлын тогтоолын төсөл /Засгийн газар 2024.12.25-ны өдөр өргөн мэдүүлсэн, анхны хэлэлцүүлэг/
• Европын сэргээн босголт, хөгжлийн банк үүсгэн байгуулах тухай хэлэлцээрт оруулсан нэмэлт, өөрчлөлтийг хүлээн зөвшөөрч, соёрхон батлах тухай хуулийн төсөл /Засгийн газар 2024.12.23-ны өдөр өргөн мэдүүлсэн, зөвшилцөх, хэлэлцүүлэх/
• Хархорум хотын бүтээн байгуулалт, хөгжлийг дэмжих тухай хуулийн төсөл болон хамт өргөн мэдүүлсэн хууль, тогтоолын төслүүд /Засгийн газар 2024.12.20-ны өдөр өргөн мэдүүлсэн, хэлэлцэх эсэх/
• “Монгол Улсын Засгийн газар, Бүгд Найрамдах Хятад Ард Улсын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай” Улсын Их Хурлын тогтоолын төсөл /Засгийн газар 2024.12.25-ны өдөр өргөн мэдүүлсэн, эцсийн хэлэлцүүлэг/
• Монгол Улсын Ерөнхий сайдын мэдээлэл: Авлигатай тэмцэх 5Ш ажиллагааны хүрээнд хийгдсэн “Шил” ажиллагааны хэрэгжилтийн талаар
• Баталсан хууль тогтоолын эцсийн найруулга

Хурлын эхэнд П.Сайнзориг нарын таван гишүүн өргөн мэдүүлсэн Монгол Улсад хөдөлмөр эрхлэх гадаад ажилтны тоо, хувь хэмжээ тогтоохгүй байх, ажлын байрны төлбөрөөс чөлөөлөх тухай хуулийн төслөө татан авах албан бичиг ирүүлсний дагуу тус хуулийн төслийг татан авсанд тооцсоныг УИХ-ын дарга мэдэгдсэн.

Хэлэлцэж буй асуудалтай холбоотойгоор УИХ-ын гишүүн Д.Энхтүвшин асуулт асуулаа. Тэрбээр хоёр улсын Засгийн газар хоорондын хэлэлцээрийн эдийн засгийн үр өгөөж нь хэр вэ? Ямар хугацааны дараа үр өгөөжөө өгөх вэ? гэдгийг асуусан юм. 

Үүнд Б.Дэлгэрсайхан сайд дараах хариултыг өгөв:

Бид төмөр замыг холбосноор эрчим хүчний нүүрсийг экспортлох чухал ач холбогдолтой. Төмөр зам 5.8 жилийн хугацаанд өртгөө нөхнө. Бидний тооцооллоор нэг тонн нүүрсийг 45 центээр зөөвөрлөнө гэв. 

Ж.Ганбаатар гишүүн: Эрдэнэс таван толгой компани 2025 онд хэдэн тонн нүүрс арилжаалахаар төлөвлөсөн бэ? Яг албан ёсны тоо хэлж өгөөрэй. Би тэрний дагуу шахна шүү. Мөн ямар нэг бартер байхгүй, орлого тасарна гэсэн зүйл байхгүй биз дээ? Албан ёсоор сонсмоор байна. 

Гишүүний асуултад Эрдэнэс таван толгой компанийн захирлыг үүрэг гүйцэтгэгч дараах хариултыг өглөө:

-ЭТТ 2023 онд Биржээр 10 сая, 2024 онд 15 сая тонн нүүрс экспортолсон. Үүнээс 2024 онд коксжих нүүрс 3 сая, сул коксжих нүүрс 3 сая, эрчим хүчний нүүрс 3 сая тус тус гаргасан. 2025 онд China Energy-д нийлүүлэх 5 сая тонныг тооцохгүй гэвэл 30 сая тонн нүүрс арилжаална.