Уул уурхайн бүтээгдэхүүний биржийн арилжаанд хувийн хэвшлийн оролцоо, хяналт алдагдсан талаар мэдээлж байна.

Эдийн засагч Б.Өлзийбаяр:

-Уул уурхайн бүтээгдэхүүний биржийн тухай хууль 2 жилийн өмнө батлагдсан. Мөн Монголын хөрөнгийн бирж уул уурхайн бүтээгдэхүүний биржийн үйл ажиллагаа эрхлэх зөвшөөрөл авснаас хойш 1.3 жил өнгөрч байна. Энэ хугацаанд Үнэт цаасны компаниуд уул уурхайн брокерын үйлчилгээ үзүүлэх зөвшөөрөл авсан ч одоог хүртэл Монголын хөрөнгийн бирж “брокергүйгээр” арилжаа хийсээр байгаа.

Уул уурхайн бүтээгдэхүүний биржийн тухай хуулийн ач холбогдол нь Монголын экспортын 80 хувийг эзэлж байгаа нүүрс, зэс, төмрийн хүдэр зэрэг бүтээгдэхүүнийг нээлттэй ил, тодоор, өрсөлдөөнт зах зээлийн зарчмаар арилжаалж баялгийн тэгш хуваарилалтыг сайжруулах байсан.

Гэтэл өнөөдөр уул уурхайн биржийн худалдагч компанийн дийлэнх нь төрийн оролцоотой компаниуд. Тэгэхээр уул уурхайн бүтээгдэхүүний арилжаанд хөндлөнгийн хянагч, зохицуулагчийн оролцоо ихээхэн дутагдалтай байгаа. “Монголчууд мурьдаг” гэдэг ойлголтоос салахад биржийн үйл ажиллагаанд брокер компаниудын оролцоо маш чухал байна. Төр, хувийн хэвшил хамтарч байж аливаа зүйл сайжирдаг.

Тиймээс уул уурхайн бүтээгдэхүүний биржийн арилжаанд төрийн оролцоог бууруулахын тулд брокерын компаниуд арилжааг зуучилж, худалдан авагчдын тоо, өрсөлдөөнийг нэмэх нэн шаардлагатай байна.