УИX даxь Ардчилсан намын бүлгийн ажлын албаны xуулийн зөвлөx Г.Эрдэнэбат УИХ-ын гишүүдийн бүрэн эрхийг түдгэлзүүлэх асуудлаар сэтгүүлчдэд мэдээлэл өглөө.

Тэрбээр "Тэднийг айхавтар гэмт хэрэг үйлдсэн тухай шуугиад эхэллээ. "Нүүрсний гэх энэ хэрэг улстөрийн захиалгатай юм болов уу гэж бодогдохоор байна. УИХ-ын гишүүдийн бүрэн эрхийг түдгэлзүүлэх асуудлыг ч улстөрийн захиалгатай тоглоом гэж харлаа. Бүрэн эрхийг нь түдгэлзүүлээгүй дөрвөн хүний шүүх хурал болж байна. Тэгвэл энэ гурван гишүүний бүрэн эрхийг ч мөн түдгэлзүүлэхгүйгээр шүүж яагаад болохгүй юм бэ. Зарим гишүүний мөрдөн шалгах ажиллагаа дууссан. Одоо юу мөрдөх гээд бүрэн эрхийг нь түдгэлзүүлэх гээд байна вэ.

Өчигдөр сонирхолтой хууль бус зүйл боллоо. УИХ-ын тухай хуулиар УИХ-ын гишүүний халдашгүй байдлын асуудлыг Халдашгүй байдлын дэд хороо, Хуульзүйн байнгын хороо, Төрийн байгуулалтын дэд хороогоор хэлэлцээд Төрийн байгуулалтын байнгын хорооны саналаар УИХ-ын чуулган санал хураагаад нууцаар шийддэг. Ямар нэгэн намын бүлэг энэ асуудлыг шийдэхгүй шүү дээ. Гэтэл яагаад намын бүлэг хуралдаж байна вэ гэхээр энэ улстөрийн асуудал болчхож байна.

Өнөөдөр хүмүүс бухимдаж байна. Нийгмийн бухимдлыг дуулиант эрүүгийн хэргээр л тэжээж байна шүү дээ. Шийдэж чадахгүй байгаа үнийн өсөлт, эдийн засгийн хямрал зэрэг олон асуудлаа "Больж муу хогийг шоронд суулгавал таарна" гэдэг үгээр халхавчилж голоо зогоож байна. Ээлжлээд л дуулиант авлигын хэргийн талаар яриад байгааг улстөрийн шалтгаантай гэж харж байна. Өмнө нь гарч байсан авлигын хэргүүд хаачсан юм, 7.3 тэрбум төгрөгийн хэргийг яагаад огт ярихгүй алга болсон юм" гэв.