Монгол үндэсний хоолны соёлыг гадаад, дотоодын иргэдэд таниулах, жуулчдын хэрэгцээнд нийцсэн хотын аяллын бүтээгдэхүүн, зочлох үйлчилгээний соёлыг дээшлүүлэх зорилгоор “UB Food festival 2023” арга хэмжээ эхэллээ.  

Арга хэмжээнд ресторан, кофе шоп зэрэг хоол үйлдвэрлэлийн 40 гаруй байгууллагууд оролцож, олон орны хоол зууш, амттанаар үйлчилгээ үзүүлэх аж.  

Г.Энхбатын гэр бүл “UB Food festival”-д анх удаа л ирж байна. Бяслагтай шорлог, веган хоолыг нь идлээ. Тухтай орчинд, хүүхдүүд маань чөлөөтэй тоглоод маш их таалагдлаа. Хоолнууд нь дундаж л үнэтэй байна. Олон төрлийн хоолноос идэж үзэх боломжтой  нь сонирхолтой байв” гэлээ.

Ц.Болормаа “Өнөөдөр гэр бүлээрээ “UB Food festival”-ийг зорьж ирлээ. Хоолны амт маш их таалагдсан. Ногоон зүлгээ тойруулж хоолны асруудаа байрлуулсан нь зөв шийдэл санагдлаа. Учир нь хүүхдүүд чөлөөтэй гүйж харайн тоглож байна. Хоолны үнийн хувьд боломжийн байна” гэв.

Э.Мөнхлэй “Ээж аавтайгаа энд ирсэн маш гоё байна. Хүссэнээрээ тоглоод, амттай хоол идсэн. Би тэмцээнд  орох гэсэн ч амжаагүй л дээ. Гэхдээ зүгээр ээ, зайрмаг идээд гоё болчихсон” гэлээ.

Монголын тогооч нарын холбооны гишүүн Д.Дэвшил “Энэ жилийн арга хэмжээг Нийслэлийн аялал жуулчлалын газар болон Монголын тогооч нарын холбоо хамтран зохион байгуулж байна. Гурван өдрийн турш 10-22 цагийн хооронд үргэлжилнэ.  

Энэ жил оролцогч байгууллагууд “UB Food festival”-д зориулан нэрийн хоолны цэсээр үйлчилж байна. Уг байгууллагуудыг нээлттэй бүртгэж оролцуулсан. Дараа жил эдгээр байгууллагаас шилдэг гэсэн байгууллагуудыг сонгож оролцуулна. Гурван өдрийн турш амталгаат хоолны шоу тэмцээн болно. Өнөөдөр алимны модоор утаж болгосон бүтэн хонины махаар хийсэн хоолны тэмцээн болов. Хоолны шоу, фестиваль учир оролцогч байгууллагууд хоолны үнийг өөрсдөө тогтоосон” гэлээ.

Тус арга хэмжээ Сүхбаатарын талбайд энэ сарын 18-20-ны өдөр болно. Энэ үеэр амьд хөгжмийн тоглолт, олон төрлийн тэмцээн уралдаан, хоолны амталгаа, хоолны шоу үзүүлбэрүүд зэрэг сонирхолтой арга хэмжээнүүд зохион байгуулагдах аж.