Өнгөрч буй долоо хоногт өрнөсөн онцлох үйл явдлуудаас тоймлон хүргэж байна. 

ШИНЭЭР СОНГОГДСОН НЭР ДЭВШИГЧДЭД УИХ-ЫН ГИШҮҮНИЙ ҮНЭМЛЭХ ОЛГОВ

УИХ-ын ес дэх удаагийн сонгуулийн үр дүнд сонгогдсон 126 нэр дэвшигчийг батламжилж, Сонгуулийн ерөнхий хорооны удирдлагууд өнгөрсөн даваа гарагт УИХ-ын гишүүний үнэмлэх олголоо. УИХ-ын сонгуулиар МАН 68, АН 42, ХҮН найм, ИЗНН болон Үндэсний эвсэл тус бүр дөрвөн суудал авснаар УИХ-д таван нам, эвслийн төлөөлөл ажиллах болов.



Ерөнхийлөгч мөн өдөр УИХ-д суудалтай нам, эвслийн дарга нарыг хүлээн авч уулзлаа. Төрийн тэргүүн УИХ-ын ээлжит сонгуульд суудал авсан нам, эвслүүд сонгуулийн үеэр өрнөсөн маргаан, талцлыг умартаж, улс орны нийтлэг эрх ашгийн төлөө нэгдмэл байж, ажлаа хийх цаг ирснийг сануулав. 

Монгол Улсын тусгаар тогтнол, аюулгүй байдал, үндэсний эв нэгдлийг хангах, хамгаалахын төлөө харилцан ойлголцлыг чухалчилж, урагшаа харж ажиллахыг захилаа. 

УИХ-ЫН ДАРГААР Д.АМАРБАЯСГАЛАНГ ТОМИЛЛОО

Монгол Улсын Ерөнхийлөгчийн товлон зарласны дагуу шинэ УИХ-ын анхдугаар чуулган өнгөрсөн мягмар гарагт боллоо. УИХ-ын дэгийн тухай хуульд зааснаар анхдугаар чуулганыг шинээр сонгогдсон гишүүдээс насаар хамгийн ахмад нь чуулганыг даргална гэж заасны дагуу ШУА-ийн Ерөнхийлөгч, Академич Д.Рэгдэл даргалж, бусад гишүүд цагаан толгойн үсгийн дарааллаар гарч УИХ-ын гишүүний тангараг өргөж, Төрийн сүлдэнд ёсолж хүндэтгэл үзүүлэв. 



УИХ-ын гишүүд тангаргаа өргөснөөр бүрэн эрх хэрэгжиж эхлэх бөгөөд УИХ-ын чуулганаар хэлэлцсэн эхний асуудал нь УИХ-ын шинэ даргыг томилох тухай байв.



МАН-ын Удирдах зөвлөлийн хуралдааны шийдвэрээр МАН-ын Ерөнхий нарийн бичгийн дарга, ЗГХЭГ-ын дарга, Монгол Улсын сайд Д.Амарбаясгаланг УИХ-ын даргаар томилох болсон шийдвэрийг чуулганы танхимд танилцуулж, санал хураалт явуулахад хуралдаанд оролцсон 126 гишүүн таван гишүүн дэмжээгүй, бусад нь дэмжсэн санал өглөө. Ингээд олонхийн саналаар ес дэх удаагийн УИХ-ын дарга томилогдож, бүрэн эрхээ хэрэгжүүлж эхлэв. 

Я.СОДБААТАРЫГ МАН-ЫН ГЕНСЕК, Г.ЗАНДАНШАТАРЫГ ЕРӨНХИЙЛӨГЧИЙН ТАМГЫН ГАЗРЫН ДАРГААР ТОМИЛЛОО 



Ийнхүү УИХ-ын ээлжит сонгуулийн үр дүнд байгуулагдсан парламентын бүрэн эрх хэрэгжиж эхэллээ. Сонгуулийн үр дүнтэй холбоотойгоор хэд хэдэн шинэ томилгоо хийсэн. УИХ-ын даргаар томилогдсон Д.Амарбаясгалан МАН-ын генсекийн албаа хүлээлгэн өгсөн бөгөөд Ерөнхийлөгчийн Тамгын газрын даргаар ажиллаж байсан Я.Содбаатарыг МАН-ын Бага хурал хуралдах хүртэл Ерөнхий нарийн бичгийн даргын үүрэг гүйцэтгэгчээр томиллоо. 



Харин Я.Содбаатарын эрхэлж байсан Ерөнхийлөгчийн тамгын газрын даргаар энэ сонгуульд унасан УИХ-ын дарга асан Г.Занданшатар томилогдож, мөн өнгөрсөн мягмар гарагаас шинэ ажлаа хүлээн авлаа. 

УИХ-ЫН ДЭД ДАРГААР Х.БУЛГАНТУЯА, Б.ПҮРЭВДОРЖ НАРЫГ ТОМИЛЛОО


Чуулганы өнгөрсөн баасан гарагийн нэгдсэн хуралдаанаар УИХ-ын дэд даргыг томилов. УИХ дахь МАН-ын бүлгээс УИХ-ын дэд даргаар Х.Булгантуяаг, УИХ дахь АН-ын бүлгээс УИХ-ын дэд даргаар Б.Пүрэвдоржийг нэр дэвшүүлснийг гишүүдийн олонх дэмжлээ. 

УИХ-ын дэд даргад нэр дэвшүүлсэн Х.Булгантуяа, Б.Пүрэвдорж нарыг хуралдаанд оролцсон 110 гишүүн 100 хувь дэмжсэн тул УИХ-ын тогтоолын төслийг баталсан юм.

УИХ-ЫН БАЙНГЫН ХОРООНЫ БҮРЭЛДЭХҮҮНИЙ ТУХАЙ УИХ-ЫН ТОГТООЛЫГ БАТЛАВ



УИХ-ын дэд дарга нарыг томилсны Байнгын хорооны бүрэлдэхүүнийг батлах тухай асуудлыг хэлэлцэ. УИХ-ын 11 байнгын хороонд гишүүдийн саналаар хуваарилж, УИХ-ын дарга чуулганы нэгдсэн хуралдаанд уншиж танилцуулаад, Монгол Улсын Их Хурлын Байнгын хорооны бүрэлдэхүүний тухай УИХ-ын тогтоолыг батлав. 

126 гишүүд ямар байнгын хороонд хуваарилагдсаныг мэдэхийг хүсвэл ЭНД дарна уу. 

МОНГОЛ УЛСЫН ЕРӨНХИЙ САЙДААР Л.ОЮУН-ЭРДЭНИЙГ УЛИРААН ТОМИЛОВ

УИХ-ын 2024 оны ээлжит сонгуулийн дүнгээр УИХ-д олонх суудал авсан МАН Лувсаннамсрайн Оюун-Эрдэнийг Монгол Улсын Ерөнхий сайдад нэр дэвшүүлэн, 2024 оны долоодугаар сарын 05-ны өдөр Ерөнхийлөгч У.Хүрэлсүхэд өргөн мэдүүлж, дараа нь УИХ-ын чуулганаар уг асуудлыг оруулж хэлэлцэн баталлаа.

Ерөнхий сайдыг томилох асуудлыг хэлэлцэн хуралдаанд оролцсон 104 гишүүний 103 нь дэмжсэнээр Л.Оюун-Эрдэнэ Монгол Улсын Ерөнхий сайдаар томилогдож, гүйцэтгэх засаглалын тэргүүнээр үргэлжлүүлэн ажиллахаар боллоо. Нэг гишүүн түүний эсрэг санал өгсөн нь УИХ-ын гишүүн Ч.Лодойсамбуу байв. 

Тэрбээр, Нийт сонгогчдын 62 хувь нь Засгийн газарт сэтгэл хангалуун бус байсан. Тиймээс Ерөнхий сайд улиран болоход тийм ч их баярлах зүйл биш. Өнгөрсөн 3 жил, сүүлийн хэдэн сард Монголын нийгмийг талцуулж, үзэл суртлаар бохирдуулсан. Энэ бүхэн дээр Монголын ард түмэн дүн тавьсан. Тэгэхээр энэ бол баярлах зүйл биш Монголын ард түмний хувьд гунигтай явдал шүү гэв.  




Ерөнхий сайд Л.Оюун-Эрдэнэ, Энэ удаагийн сонгууль зөвхөн парламентын хувьд шинэ 30 жилийг эхлүүлэх бус нийгэм, удаан хугацаанд хуримтлагдсан суурь асуудлыг шийдвэрлэхэд чухал цаг хугацаа байна гэдэгт итгэж байна. Улс орон бол хүний биетэй адил амьд организм билээ. Эд эс, эрхтэн бүхэн эрүүл байж, цусны эргэлт хурдсаж, дархлаа хэвийн байж эрүүл, эрч хүчтэй байдаг шиг улс орны хөгжил цогц ойлголт бөгөөд шинж тэмдэгтэй зууралдах биш амьд организмыг доголдуулж буй шалтгааныг зөв оношилж, суурь реформ хийх ёстой хэмээгээд ирэх дөрвөн жилд боомтын сэргэлт, аялал жуулчлал, цахим засаглал, нефтийн үйлдвэр зэрэг эхлүүлсэн төслөө хэрэгжүүлж үр дүнд хүрэх ёстой.

Мөн ирэх дөрвөн жилд Засгийн газрын хийж хэрэгжүүлэх гол ажлуудыг дурдсан юм. Үүнд, 30 жил хүлээгдсэн эрчим хүчний салбарын либералчлалыг цаг алдалгүй хийхэд улс төржилгүй хамтран ажиллахыг парламентад суудалтай бусад намын гишүүдээсээ хүсэв. Эрчим хүчний салбарыг алдагдалгүй ажиллуулах, зах зээлийн зарчмаар хөгжүүлэхийн тулд либералчлах ёстойг салбарынхан, үе үеийн Засгийн газрууд сайн мэддэг боловч хийж, хэрэгжүүлдэггүй. Энэ удаа Ерөнхий сайд Л.Оюун-Эрдэнэ улс төрийн эр зориг гаргаж хэлэх үг, хийх ажлын жагсаалтынхаа нэгдүгээрт эрэмбэлсэн нь анхаарал татав. Энэ чиглэлд бусад нам, эвслүүдийг улсынхаа хөгжлийн төлөө хамтрахыг уриалсан юм. 

ЭРХ БАРИГЧИД БУСАД НАМУУДАД ХАМТАРСАН ЗАСГИЙН ГАЗАР БАЙГУУЛАХ УРИЛГА ӨГӨӨД БАЙНА

Ерөнхий сайд үүрэгт ажилдаа томилогдлоо. Одоо шинэ Засгийн газрын бүтэц, бүрэлдэхүүнийг цаг алдалгүй батлахад  анхаарал хандуулж байна. Ялсан намын дарга Л.Оюун-Эрдэнэ парламентад суудалтай намуудад хамтарсан Засгийн газар байгуулах саналаа албан ёсоор тавиад буй юм. 



МАН-ын Удирдах зөвлөл хуралдаж, МАН-ын дарга Л.Оюун-Эрдэнэ, УИХ-ын дарга Д.Амарбаясгалан болон МАН-ын Ерөнхий нарийн бичгийн даргын үүрэг гүйцэтгэгч Я.Содбаатар нарын бүрэлдэхүүнтэй Ажлын хэсэг байгуулжээ. Ажлын хэсгийнхэн Үндсэн хуулийн өөрчлөлтийг хэрэгжүүлэх, хууль эрх зүйн шинэчлэл хийхэд бусад нам, эвслүүдтэй зөвшилцөх, шинэ Засгийн газрыг байгуулах, шинэ Засгийн газрын мөрийн хөтөлбөр, бүтэц, бүрэлдэхүүний асуудлаар УИХ-д суудал авсан нам, эвслүүдтэй санал солилцоно.

АН-ын Улс төрийн зөвлөл уг асуудлаар өнгөрсөн пүрэв гарагт хуралдаж, хамтарсан Засгийн газарт орохыг дэмжсэн гэх мэдээлэл хэвлэлүүдэд гарсан. Гэвч АН-аас энэ талаар албаны ёсны мэдээлэл хийгээгүй байна. ХҮН нам мөн байр сууриа илэрхийлээгүй буй юм. Шинэ Засгийн газрын үндэсний их баяр наадмын өмнө байгуулахаар төлөвлөжээ.