МАН-ын Удирдах зөвлөлөөс гарсан шийдвэрийн талаар намын нарийн бичгийн дарга Н.Энхбаатар мэдээлэл өглөө.

Тэрбээр, МАН-ын Удирдах зөвлөл хуралдаж, МАН-ын дарга Л.Оюун-Эрдэнэ, УИХ-ын дарга Д.Амарбаясгалан болон МАН-ын Ерөнхий нарийн бичгийн даргын үүрэг гүйцэтгэгчээр өнөөдөр томилогдсон Я.Содбаатар нарын бүрэлдэхүүнтэй Ажлын хэсэг байгуулжээ. Ажлын хэсгийнхэн Үндсэн хуулийн өөрчлөлтийг хэрэгжүүлэх, хууль эрх зүйн шинэчлэл хийхэд бусад нам, эвслүүдтэй зөвшилцөх, шинэ Засгийн газрыг байгуулах, шинэ Засгийн газрын мөрийн хөтөлбөр, бүтэц, бүрэлдэхүүний асуудлаар УИХ-д суудал авсан нам, эвслүүдтэй санал солилцоно.

Ажлын хэсгийнхэн Удирдах зөвлөлөөс тодорхой чиглэлүүд өгсөн. МАН-ын мөрийн хөтөлбөрт тусгасан Баялгийн сан, Орон сууцжуулах хөтөлбөр, авлигатай тэмцэх үйл ажиллагаа, хүний эрхийг хангах, бүсчилсэн хөгжлийг дэмжих зэрэг чиглэлээр бусад намуудтай санал солилцох үүрэг чиглэл өгсөн.

Мөн УИХ-д суудал авсан бусад намуудын мөрийн хөтөлбөрөөс ард иргэдийн дэмжлэг хүлээсэн заалтуудыг Засгийн газрын мөрийн хөтөлбөрт тусгаж ажиллах боломжийг судлах хүрээнд зөвшилцлийн ажлыг өнөөдрөөс эхлүүлж байна. Зөвшилцөл амжилтад хүрвэл хамтарсан Засгийн газар байгуулах асуудал яригдана.

-Сайд нарыг УИХ-аас томилох уу, гаднаас томилох уу. Энэ талаар яригдав уу?  
-126 гишүүнтэй УИХ-тай боллоо. Өмнө нь ажиллаж байгаагүй олон тооны нам, эвслүүд УИХ-д орж ирлээ. Засгийн газрын үйл ажиллагааны хөтөлбөрийг ирэх дөрвөн жилд хэрэгжүүлэх, тогтвортой байдлыг хангахын тулд сайд нарын дийлэнхийг УИХ-аас томилно гэдэг ерөнхий ойлголттой байна гэв.