Монгол Улсын Их Хурлын 2024 оны ээлжит сонгуулийн дүнгээр Улсын Их Хуралд олонх суудал авсан Монгол Ардын Нам Лувсаннамсрайн Оюун-Эрдэнийг Монгол Улсын Ерөнхий сайдад нэр дэвшүүлэн 2024 оны 07 дугаар сарын 05-ны өдөр Монгол Улсын Ерөнхийлөгч Ухнаагийн Хүрэлсүхэд өргөн мэдүүлсэн.

Тодруулбал, Ерөнхийлөгч Монгол Улсын Үндсэн хуулийн 39.1.2-т заасны дагуу Л.Оюун-Эрдэнийг Монгол Улсын Ерөнхий сайдаар томилох саналыг Монгол Улсын Их Хурлаар хэлэлцэж байна.

Ерөнхий сайд улиран сонгогдох эсэх асуудлаар УИХ-ын чуулган хэлэлцэж Л.Оюун-Эрдэнээс гишүүд асуулт асуун, санал, шүүмж хэлж байна.

УИХ-ын гишүүн Ч.Лодойсамбуу:
- Нийт сонгогчдын 62 хувь нь Засгийн газарт сэтгэл хангалуун бус байсан. Тиймээс Ерөнхий сайд улиран болоход тийм ч их баярлах зүйл биш. Өнгөрсөн 3 жил, сүүлийн хэдэн сард Монголын нийгмийг талцуулж, үзэл суртлаар бохирдуулсан. Ямар арга хэрэглэж байгаагаас хүний хандлага харагддаг. Энэ бүхэн дээр Монголын ард түмэн дүн тавьсан. Тэгэхээр энэ бол баярлах зүйл биш монголын ард түмний хувьд гунигтай явдал шүү.  Засгийн газрын бүтцээ яаж тодорхойлох гэж байна вэ? Төрийн дарамтан доор юу ч хийх боломжгүй болсон компаниуд бий.

Ерөнхий сайд Л.Оюун-Эрдэнэ:
- Өөрийг чинь парламентэд орж ирсэнд баяртай байна. Танд бүх мэдээллийг авах онцгой эрх бий. Гаднаас харах, дотор орж ирээд хийх хоёрт ялгаа их. Хэрэв та үнэхээр үнэн байя гэж хүсвэл зургаан сар, ядаж нэг жил ажиллаад бүх зүйлийн факт өөр байвал тэр үед түүнийгээ шударгаар хэлээрэй. Хэвлэл мэдээллийн олон төлөөлөл парламентэд орж ирсэнд баяртай байна.

УИХ-ын гишүүн Х.Тэмүүжин:
- Уул уурхайгаас бусад салбартаа анхаармаар байна. Залуусын мөрөөдөл, эрх чөлөөний айдас доромжлолоос айгаад гадагшаа дүрвэх үзэгдэл ихсэж байна. Бизнесийн эрх чөлөө, төрийн дарангуйлал хавчигдсан хэсгийгээ эргээд нэг хараарай. Авлигатай тэмцэх үйл явц хэцүү нь үнэн. Тодорхой хүмүүст хариуцлага тооцож, тогтолцооны хувьд хөрсийг нь шинэчилж манлайлал үзүүлэх, үеэ өнгөрөөсөн домог хэлсэн хэддээ биш хажуу хавиргын авлигачдадаа хариуцлага тооцох ёстой.

УИХ-ын гишүүн Н.Алтанхуяг:
Бид 1992 оноос ардчилсан сонгуультай гэж бодож байсан. Гэтэл энэ удаагийн мөнгөний сонгууль болчихлоо. Таны хийх гэж байгаа сонгуулийн шинэ тогтолцоо мөнгөн дээр хүрээд унаж байна. Нэг том нам, бусад нь дагуул намаар явна.

Холимог тогтолцоо нь тодорхой хэмжээнд дээрдсэн гэж бодож байна. Цөөнхийн хяналтын функцыг нь дэмжээд өгөөрэй. АН хяналтын үүргээ сайн гүйцэтгэмээр байна. Цөөнх болохгүй байгаа зүйлийг санал болгож, гаргаж ирэх давуу талтай. Авлигатай тэмцээд байхад яагаад буурахгүй байгаа нь үнэн. Үүний эсрэг дэмжиж ажиллахдаа бэлэн байна. УИХ-д орж ирж мэдээлэл хийж бай л даа. Өнгөрсөн 3 жилд та харагдсангүй. Энэ буруу шүү. Санхүү эдийн засгийн бодлогоо чадвартаа хүнд өгчих л дөө. Хүрэлбаатар, Жавхлан хоёр бүтэн дампууруулсан шүү.

УИХ-ын гишүүн М.Нарантуяа:
- Өмнөх Засгийн газрын мөрийн хөтөлбөр үргэлжилж явах уу. Наадмын дараа намар гэдэг, сайжруулсан түлшний улмаас өнгөрсөн 4 жилд 3600 хүн амиа алдсан. Үүнийг Ерөнхий сайд маш сайн анхааралдаа аваасай.

УИХ-ын 104 гишүүнээс 103 нь дэмжсэнээр Л.Оюун-Эрдэнэ Ерөнхий сайдаар томилох тухай УИХ-ын тогтоол батлагдаж үргэлжлүүлэн ажиллахаар боллоо.