"Катар 2022" ДАШТ-ий C хэсгийн дөрөв дахь тоглолт Аргентин болон Мексикийн шигшээ багийн хооронд болоход Аргентин 2-0 харьцаагаар хожлоо.

Эхний үед хоёр баг төдийлөн довтолж чадаагүй. Мексик хамгаалалтын бүрэлдэхүүн гаргасан бол Аргентин бөмбөгөө дамжуулсаар 45 минут өндөрлөсөн. Хоёрдугаар үе ч адилхан эхэлсэн. Төвийн хагас хамгаалалтад бөмбөг эзэмшиж, довтолгоо найруулах хүн Аргентинд дутаж байв.

Улмаар дасгалжуулагч Скалони төвийн хагас хамгаалагч Энцо Фернандезийг сэлгээгээр оруулсан. Удалгүй баруун жигүүрт Анхел Ди Мариагийн дамжуулалтаар Лионел Месси торгуулийн талбайн гаднаас хаалгачийн зүүн доод буланд цохиж гоол орууллаа.

Энэ гоол Мессигийн Катарт оруулсан хоёр дахь, нийт ДАШТ-д оруулсан 8 дахь гоол болж домогт Диего Марадонагийн гоолын тоотой тэнцэв.

Сэлгээгээр орж ирсэн Энцо Фернандез булангийн цохилтоос Мессигийн дамжуулалтаар гайхалтай гоолыг 87 дахь минутад оруулж Аргентинд хэсгээс гарах итгэлийг нь үлдээв.

Аргентин дараагийн тоглолтод Польшийг хожвол хэсгээс нэгээр гарна. Харин Мексик Саудын Арабыг хожиж байж хэсгээс гарах боломжоо хадгална.

C хэсгийн өмнөх тоглолтуудын үр дүн:

• Аргентин 1-2 Саудын Араб
• Мексик 0-0 Польш
• Польш 2-0 Саудын Араб

Voo аппликейшн татах

• Android
• iOS