"Катар 2022" ДАШТ-ий C хэсгийн гурав дахь тоглолт Польш болон Саудын Арабын шигшээ багийн хооронд болоход 2-0 харьцаагаар Польш хожлоо.

Өмнөх тоглолтод Аргентиныг хожиж дуулиан тарьсан Саудын Арабын гарааны гурван тоглогч бэртсэний улмаас Польшийн эсрэг тоглоогүй нь үр дүнд нөлөөлөв. Саудын Арабын нэг хүн мэт хамгаалалт Польшийн эсрэг харагдсангүй.

Улмаар тоглолтын эхний гоол 39 дэх минутад орсон. Роберт Левандовскигийн дамжуулалтаар Пётр Зелински гоолдож нэгдүгээр үе өндөрлөсөн.

Хоёрдугаар үед Саудын Араб торгуулийн цохилт гүйцэтгэсэн ч Войцех Щесни Саудын Арабын багийн ахлагчийн цохилтыг хааж баатар боллоо.

Саудын Араб тоглолтын турш бөмбөг илүү эзэмшиж, илүү олон довтолж байсан ч Польшийн хамгаалалт илүү байж сөрөг довтолгоог голчилж байв. Энэ үед Саудын Арабын хамгаалагч алдаа гаргаж 82 дахь минутад Роберт Левандовски удаан хүлээсэн гоолоо орууллаа.

Лиг болон шигшээ багийнхаа хамгийн шилдэг гоолдогч тэрээр ДАШТ-д гоол оруулж үзээгүй гэсэн хар толбоо арилгаж багтаа хожил авчирлаа.

C хэсгийн өмнөх тоглолтуудын үр дүн:

• Аргентин 1-2 Саудын Араб
• Мексик 0-0 Польш

Voo аппликейшн татах

• Android
• iOS