Хүний эрхийн үндэсний комисс /ХЭҮК/-оос хурдан морины хаврын уралдаантай холбоотой цаг үеийн асуудлаар мэдээлж байна.   

ХЭҮК-ын дарга Д.Сүнжид Засгийн газраас гарсан шийдвэртэй холбогдуулан комиссын байр суурийг илэрхийллээ. Тэрбээр, Засгийн газар 2019 онд гаргасан өвөл, хаврын морин уралдааныг хориглох тухай тогтоол нь уралдаанч хүүхдийн амь нас, эрүүл мэнд, хөгжих, сурч боловсрох эрхийг хамгаалах, хүүхдийг аюултай хөдөлмөр эрхлүүлэхгүй байх түүнийг таслан зогсоох, энэ нөхцөлөөс урьдчилан сэргийлэх томоохон ахиц дэвшил байсан. 

Харин энэ тогтоолоо хүчингүй болгосноор хүүхэд нэгдүгээрт байх, хүүхдийн ашиг сонирхолыг дээдлэх зарчмаасаа ухралт хийж байна. ХЭҮК энэ шийдвэрт харамсаж байна. Иймд гаргасан шийдвэрээ эргэн харж, хүүхдэд ээлтэй шийдвэр гаргаасай гэж хүсэж байна гэв.

Мөн Хурдан морины уралдаан нь ЮНЕСКО-гийн хүн төрөлхтний соёлын биет бус өвийн жагсаалтад багтсан Монгол Улсын төрт ёсны түүхэн уламжлал, өв соёл мөн боловч өвөл, хаврын уралдаан нь түүхэн уламжлал биш гэдгийг онцоллоо.

ХЭҮК-ын гишүүн Ж.Хунан, Насанд хүрээгүй хүүхдээр морь унуулахыг хориглосон зөвлөмжийг НҮБ, Хүүхдийн эрхийн байгууллагууд өгдөг. ХЭҮК үүнийг дагадаг. Ялангуяа өвөл, хаврын улиралд хүүхдээр морь унуулахыг дэмжихгүй байна.   

Хурдан морины уралдаан өвөл, зунаас үл хамааран тэнд хүүхдийн эрхийн зөрчил явагддаг. 1996 оноос хойш буюу бүртгэл хийж эхэлсэн сүүлийн 29 жилийн хугацаанд уралдааны үеэр 52 хүүхэд амиа алдсан нь бүртгэгдсэн. Энэ бодит тоо эсэхийг хэлэх боломжгүй. Учир нь бүртгэгдээгүй амиа алдсан тохиолдлууд байхыг үгүйсгэхгүй гэв.