БОАЖЯ-наас иргэд, ААН-үүдээс ирүүлсэн гомдол, саналд хариу тайлбар өгч байна.

БОАЖЯ-ны хүрээлэн буй орчны бодлого зохицуулалтын газрын дарга Б.Буяннэмэх:

-Монгол Улсад орчны бохирдол хэрээс хэтэрчээ. Хөрсний бохирдлын шинжилгээний дүнгээс харахад нийт дээжийн 88 хувьд нь нян, хөгц, мөөгөнцөр илэрсэн. Гэр хорооллын хөрсний дээжийн 93 хувьд нянгийн бохирдол ихтэй гарсан байна. Үүнтэй холбогдуулан БОАЖЯ-аас албан даалгавар гаргасан. Монгол Улсын хөрсний бохирдол гамшгийн хэмжээнд хүрчээ. Иймд энэ асуудлыг УОК-ын хуралдаанд танилцуулахаар бэлтгэл хангаж байна.

Гандантэгчэнлин хийдэд албан даалгавар өнөөдөр хүргүүлж байна. Гаднын жуулчид гандангаар үйлчлүүлэх нь элбэг. Тиймээс ариун цэврийг сахих нь зүйтэй. Мөн түүнчлэн Соёлын яаманд соёлын өвийг угааж цэвэрлэхтэй холбоотой их цэвэрлэгээний ажил зохион байгуулах албан бичиг хүргүүлнэ.

Дарханы замын нөхөн сэргээлтийн ажлыг эрчимжүүлэх БОАЖ-ын сайдын албан даалгавар гарсныг холбогдох ААН-үүдэд хүргүүлсэн. Хатуу хучилттай авто зам барьж байгуулах нь онцгой ач холбогдолтой нь үнэн. Гэвч нөхөн сэргээлгүй өнөөдрийг хүрсэн.

2023 онд найман их цэвэрлэгээ хийнэ. Мөн эзэнгүй нохой, муур ихэссэн. Тэдгээрийн тоог цөөрүүлэх албан даалгавар гарсан. Мөн ариун цэврийн байгууламжуудыг сайжруулах, тэр дундаа аялал жуулчлалын гол бүс нутаг, тусгай хамгаалалттай газар нутаг, олон улсын болон улсын чанартай авто замын дагуу үйлчилгээ явуулж байгаа ААН-үүдийн нүхэн жорлонг татан буулгаж, стандарт хангасан ариун цэврийн байгууламжтай болгоход онцгой анхаарч ажиллаж байна.

"Ноён уул"-ыг улсын тусгай хамгаалалтад авсан. Үүнээс өмнө ашигт малтмалын тусгай зөвшөөрлүүд олгосон байгаа. Үүнийг цуцлуулахаар яаралтай арга хэмжээ авч хэрэгжүүлэх шаардлага гарсан. Энэ асуудлыг шийдвэрлэхээр БОАЖЯ, Хан, Хэнтийн уулын хамгаалалтын захиргаа ажиллаж байгаа. "Центерра гоулд", "Гачуурт" компани, "Арцат" хүүхдийн зуслан зэрэг  ААН-үүдэд албан тоот удаа дараа хүргүүлсэн. Хуулийн дагуу тухайн байгууллагуудын барилга, байшин буулгах асуудлыг Сэлэнгэ аймгийн Засаг дарга хариуцах ёстой.

БОАЖЯ-ны Салбарын хяналтын газрын дарга Б.Мөнхтогтох:

-МХЕГ татан буугдсан. Чиг үүрэг нь харьяалагдаж байгаа. Тухайлбал Байгаль орчны чиглэлийн хяналт манай яаманд харьяалагдаж байгаа. Салбарын хяналтын чиглэлийн хүрээнд дунд эрсдэлтэй үнэлэгдэж байгаа 949 объектод хяналт хийхээр төлөвлөгөө батлуулсан. Тэгэхээр төлөвлөгөөт болон урьдчилан сэргийлэх хяналт, шалгалт хийх нөхцөл бүрдсэн гэж ойлгож болно.

Мөн төлөвлөгөөт бус хяналтыг хийж байгаа. Он гарснаас хойш нийт 85 өргөдөл хүлээн авснаас 64-ийг шийдвэрлэсэн. Таван байгууллагын өргөдлийг хүлээн авах боломжгүй гээд буцаан шилжүүлсэн.

Урьдчилан сэргийлэх хяналт хийж байна. Агаарын чанарын асуудалд урьдчилан сэргийлэх хяналт хийж байгаа. Мөн Хуш модны самар боловсруулах үйлдвэрийн үйл ажиллагаанд шалгалт хийлээ. Эмээлт орчмын үйлдвэрүүдийн малын гаралтай бүтээгдэхүүний хог, хаягдлын асуудал маш тулгамдаж байна.