“Яармаг, I хорооллыг холбох гүүрийг буулгаж, дахин барина гэх мэдээлэл худал”

Яармаг, I хорооллыг холбох гүүрийн ажил 2022 онд эхэлсэн билээ. Тус гүүрийг 2024 оны зургаадугаар сарын 1-нд ашиглалтад оруулна хэмээн мэдээлж байсан.

Гэсэн ч өнгөрсөн долоо хоног буюу энэ сарын 21,22-нд орсон борооны улмаас Туул голын усны түвшин нэмэгдэж тус гүүр усанд автсан байгаа зураг, мэдээлэл цахим сүлжээнд түгсэн юм.

Бид уг нөхцөл байдлыг сурвалжлахаар Яармагийн 4-р хороо буюу гүүр баригдаж буй талбайг зорив. Биднийг очиход гүүрний их бие үерийн усанд автаагүй ч төгсөл хэсэг болон ажилчдын байрлах кэмп гэр усанд автсан байлаа. Гүүр лүү хүрч очих боломжгүй байсан ба гүүрний их бие хэсэгт авто замын ажил явагдаж, машин техник хэрэгсэл ажиллаж байв.

Энэ талаар Нийслэлийн Замын Хөгжлийн газрын хэвлэлийн төлөөлөгч н.Тогтохоос тодруулахад “Удахгүй энэ асуудлаар албан ёсоор мэдээлэл өгнө. Гүүрийг буулгаж дахин барина гэсэн мэдээлэл худлаа” гэсэн юм.  

Нэгдүгээр хэсэг буюу гүүрний барилгын ажлыг Яармаг талаас "Мотор сервис", нэгдүгээр хороолол талаас "Тэргүүн саруул зам", “Туулын гүүр далай” ХХК гүйцэтгэсэн. Харин гүүрний авто замын ажлыг “Тотал инж” ХХК хариуцаж байгаа аж.  

Өнгөрсөн онд GoGo.mn сайт тус гүүрний ажлыг сурвалжлахад "Мотор сервис" ХХК-ийн гүүрний талбайн инженер хэлэхдээ "Гүүрийн хувьд хүчитгэсэн дамнуургатай, дан татлагатай сайн чанарын гүүр. Гүүр, замыг барьж буй компани хүн хүч, техник хангалттай, мэргэжлийн ажилчид ажиллаж байна” гэж байв.  

Хотын дарга асан Д.Сумъяабазарыг ажиллаж байх үед энэхүү гүүр ашиглалтад орсноор Яармагийн түгжрэлийг 50 хувиар бууруулна гэж мэдээлж байжээ. Харин өнгөрсөн дөрөвдүгээр сард Хотын дарга Х.Нямбаатар тус бүтээн байгуулалтын байршилд ажиллан, төсөл хэрэгжүүлэгч аж ахуйн нэгжүүдийн төлөөлөлтэй уулзсан юм. Энэ үеэр Шинэ гүүр ашиглалтад орсноор хоногт 23 мянган машин нэвтрүүлэх чадвартай болж, замын ачаалал 20 орчим хувиар буурна хэмээн НЗДТГ-аас мэдээлжээ. 

Гэрэл зургуудыг: Г.Өнөболд, Б.Даваа