• The International 2024 тэмцээний Зүүн өмнөд Азийн урьдчилсан шат болно
• Тэмцээнд Монголын нэг баг, монгол тоглогчтой хоёр баг оролцож байна

DOTA 2 (Defense of the Ancient)-ын 2024 оны дэлхийн аварга шалгаруулах тэмцээн буюу "The International 2024 /TI13/" есдүгээр сарын 04-15-ны хооронд болно.

Тэмцээнд Зүүн Өмнөд Азийн бүсийг төлөөлж хоёр баг оролцох бөгөөд тус хоёр багийг шалгаруулах урьдчилсан шатны тэмцээн энэ сарын 19-23-д болох учиртай. Тэгвэл уг шатанд Монголын нэг баг, монгол тоглогчтой хоёр баг оролцоно.

Урьдчилсан шатанд Хятадаас бусад Азийн шилдэг 12 баг оролцох бөгөөд эхний найм нь шууд урилгаар сонгогдсон. Энэ дунд Дашвэвгийн "Se" Төгстөр ахлагчтай Лаос, Хятад, Малайз, Индонез тоглогчдоос бүрдэх "Bleed Esports" багтаж байна.

Харин нээлттэй сонгон шалгаруулалтаас дөрвөн баг эрхээ авсан дунд Монголын "IHC Esports" болон гурван монгол тоглогчтой "PRISM Esports" багууд бий.

Мөн Баруун Европын урьдчилсан шатанд өрсөлдөх "MOUZ" багийн тоглогч Равдангийн "NARMAN" Нармандах, Зүүн Европын урьдчилсан шатанд өрсөлдөх "Natus Vincere" багийн тоглогч Отгондаваагийн "sanctity-" Сүхбат нартай нийлээд нийт 11 монгол тоглогч дэлхийн аваргын урьдчилсан шатанд өрсөлдөх юм.

• ЗУРГААДУГААР САРЫН СПОРТ: Европ, Америк тивийн аваргууд тодорно
• "Sanctity-" О.Сүхбатын шинэ баг "Natus Vincere" DreamLeague-т оролцох эрхээ авлаа

Тэмцээн Double Elimination Bracket журмаар болох бөгөөд дөрвөн өдрийн турш өрсөлдөж шилдэг хоёр нь Данийн нийслэл Копенхаген хотыг зорино.

The International-д Зүүн Өмнөд Азийн баг түрүүлж эсвэл финалдаж байсан удаагүй. Харин хүрч байсан хамгийн өндөр амжилт 2011 онд Сингапурын "Scythe Gaming", 2013 онд Малайзын "Orange Esports" гуравдугаар байр эзэлж байв.

Харин цом өргөж үзсэн тоглогч байдаг нь Малайзын "ChuaN" 2012 онд "Invictus Gaming" багийн хамт түрүүлж байв. Тэрээр хамгийн сүүлд "Neon Esports" багийг дасгалжуулж байсан.