• Хөл бөмбөгийн ДАШТ, ААШТ-ий урьдчилсан шатны тоглолтууд болж байна
• Монголын шигшээ баг эхний тоглолтоо хийлээ
• Тэд Афганистаны талбайд 1-0 харьцаагаар хожигдов

АНУ, Мексик, Канад улсуудад болох 2026 оны хөл бөмбөгийн дэлхийн аварга шалгаруулах тэмцээн, Саудын Араб улсад 2027 онд болох Азийн аварга шалгаруулах тэмцээний урьдчилсан шат үргэлжилж байна.

Монголын хөл бөмбөгийн шигшээ баг урьдчилсан нэгдүгээр шатанд Афганистаны шигшээ багтай таарсан бөгөөд нэгнийхээ талбайд ээлжлэн тоглосны дараа нийлбэр дүнгээр нэг нь цааш шалгарах учиртай.

Тэгвэл уг чухал тэмцээний эхний тоглолт Афганистаны талбайд буюу Тажикистаны нийслэл Душанбе хотод манай цагаар 10-р сарын 12-ны 22:00 цагт боллоо. Тоглолтын 60 дахь минутад Жабар Шарзагийн оруулсан ганц гоолоор Афганистанчууд 1-0 харьцаагаар хожсон.

• "Дэрэн Кап” тэмцээн 13 дахь жилдээ боллоо
• 2030 оны хөлбөмбөгийн ДАШТ-ийг гурван тивийн зургаан улсад зохионо
• Монгол клуб "AFC Cup" тэмцээний хэсгийн шатанд анх удаа хожлоо

Тоглолтын хоёрдугаар үед Монголын довтолгоо сайжирсан ч багийн ахлагч Х.Цэнд-Аюуш 78 дахь минутад улаан хуудсаар торгуулснаар үндсэн цаг дуустал 10-уулаа тоглосон юм.

Афганистан дахь улс төр, нийгмийн тодорхойгүй байдлын улмаас тус улсын шигшээ баг тоглолтуудаа Душанбе хотод хийсээр байна.

Тэмцээний хариу тоглолт 10-р сарын 17-ны 15:00 цагаас нийслэл Улаанбаатар хотод болно. Хэрэв Монголын шигшээ баг уг тоглолтод хожвол ДАШТ-ий урьдчилсан шатанд үргэлжлүүлэн тоглох юм.

Монголын хөл бөмбөгийн шигшээ баг дэлхийн чансааны 183-т жагсдаг бол Афганистан даруй 25 байраар дээр буюу 158-т эрэмбэлэгддэг.