Жаргалтай, зөөлөн гунигтай, халуухан, энхрийхэн өдрүүд ээ... гээд л аманд аялагдаж, сэтгэл догдлуулах шинэ жилийн баярын дуунууд цаанаа л нэг гоё оо.

Арванхоёрдугаар сар гармагц, гялалзан гялтганах тоглоом бүхнээр гэр, албан тасалгаагаа чимж, баярт мөчүүдээ бодон суух жаргалтай. Энэ баярт мөчийг улам ч  их хөглөдөг нь яах аргагүй шинэ жилийн дуунууд.

Ингээд гадаадын болон дотоодын шинэ жилийн баярын топ дуунуудыг хүргэж байна.

1. "Brenda Lee - "Rockin' Around The Christmas Tree" Шинэ жилийн хамгийн алдартай, хамгийн хөгжилтэй дуунуудын нэг. Энэ дуу 1958 онд анх гарсан бөгөөд одоо хүртэл дэлхийн олон орны шинэ жилийн баярын нэг хэсэг болжээ.

Дууны хэмнэл гэр бүл, найз нөхөдтэйгөө хамтдаа бүжиглэх, хөгжилдөх уур амьсгалыг бүрдүүлдэг. Сонсох бүрд баяр, аз жаргал мэдрүүлдэг нь хамгийн сайхан.

2. "Хурд- Шинэ жил" Монголын рокуудын анхдагч Хурд хамтлагийн "Мянган жилд ганц" цомгоос олонд хамгийн их таашаагдсан дуу бол яах аргагүй "Шинэ жил" юм. Жил бүрийн баяраар сонсдог, хэзээ ч уйдамгүй.

3. "Last Christmas" - Wham! Энэ дууг сонсох тоолонд хөнгөн аялгуунд нь автаж, романтик уур амьсгалд автдаг. Youtube сувагт 2009 онд нийтлэгдэж, 951 сая хандалттай болжээ

4. "Ариунаа- Цасан аялгуу" Нийтлэлийн маань гарчиг болсон энэ дууг мэдэхгүй монгол хүн тун цөөн байх. Зөвхөн шинэ жилийн баяраар ч гэлгүй өвлийн хүйтэн агаарыг мэдэрч, цасан ширхгээр хучигдсан гудмаар алхахдаа эрч хүчтэй байдал, цоглог ритмд нь хөтлөгддөг. Ялдамхаг, гоёмсог мөчүүд минь...Үүрд үлдээч.

Тэрээр энэ дуугаа 2021 онд реппер Thunder-тай хамтран шинэчлэн нийтэлсэн билээ.

5. "Happy New Year" - ABBA Мөн л хамгийн алдартай, уянгын дуунуудын нэг. Энэ дуу нь 1980 онд ABBA хамтлагийн "Super Trouper" цомогт багтсан бөгөөд шинэ жилийн баярын уур амьсгалд төгс тохирдог. 

Дууны мөрүүдээрээ хүндэтгэлтэйгээр баярын мэнд хүргэж, дэлхийн бүх хүн амьдарч буй орчноо илүү сайн, нөхөрсөг, эв найрамдлын орчин болгохын төлөө байрыг уриалдаг.

6. "Чоно- Шинэ жил" Энэ дууг олон хүн цугласан, ялангуяа хамт олноороо шинэ жилийн баяр тэмдэглэх үедээ ихэвчлэн сонсдог. Энэ дууг 2022 онд бусад дуучдын хамтаар шинэчлэн бүтээсэн хувилбараар хүргэж байна.

Хөгжим нь хурдан, эрч хүчтэй, хөгжилтэй бөгөөд залуулаг сэтгэлгээ төрүүлдэг нь таатай.

7. "Boney M - Feliz Navidad" "Feliz Navidad" бол Латин Америкийн José Feliciano-гийн алдартай бүтээл бөгөөд анх 1970 онд бичигдсэн дуу юм.

Шинэ жилийн баярын уур амьсгал оруулдаг энэ дууг Бони Эм хувилбарлан дуулсан нь нийтэд ихээхэн таалагддаг аж. Учир нь орчин үеийн хэмнэл, хурдацтай ритмтэй тул нь шинэ жилийн баярын бүхий л арга хэмжээнд дуулагдах болжээ.

8. "John Lennon & Yoko Ono – "Happy Xmas (War Is Over)" Шинэ жилийн баярын хамгийн алдартай, сэтгэл хөдөлгөсөн дуунуудын нэг. Энэ дуу нь анх 1971 онд John Lennon болон түүний эхнэр Yoko Ono нарын хамтран бичсэн бүтээл бөгөөд зөвхөн шинэ жилийн баярын төдийгүй, дэлхий даяар энх тайван, хүн төрөлхтний эв найрамдалд уриалах хүчтэй мессеж болдог.

9."Mariah Carey - All I Want for Christmas Is You" анх 1994 онд гарч, Mariah Carey болон Walter Afanasieff нар хамтран бичсэн бөгөөд баяр хөөртэй, зөөлөн, дулаан мэдрэмжийг бий болгодог.

Энэ бол бүх цаг үеийн хамгийн шилдэг шинэ жилийн дуу бөгөөд 25 жил гаруй хугацаанд шинэ жилтэй холбоотой хамгийн тааламжтай дуунуудын жагсаалтыг тэргүүлсээр ирсэн.

10. "Dean Martin – "Let It Snow! Let It Snow! Let It Snow!" Энэ дуу нь 1945 онд гарч, өвлийн сайхан өдрүүдийг магтан дуулах, дулаан орчинд хайртай дотнын хүмүүстэйгээ цагийг баяр хөөртэй өнгөрүүлэх тухай дуулсан бүтээл юм.

Dean Martin-ийн сэтгэл татам хоолой, хөгжилтэй хөгжмийн аязын хослол нь шинэ жил, өвлийн улирлыг илэрхийлэх төгс дуу болдог.