БНСУ-ын мөрдөн байцаагч нар бүрэн эрхээ түдгэлзүүлсэн Ерөнхийлөгч Юн Сок Ёлийг баривчлах хоёр дахь ажиллагааг эхлүүллээ.
Орон нутгийн цагаар үүрийн 4 цагт 3000 орчим цагдаа Ерөнхийлөгчийн өргөөний гадаа цуглараад байна. 

Өнгөрсөн сард түүнийг баривчлах захирамжийг шүүхээс гаргаж, энэ сарын эхээр холбогдох албаныхан Ерөнхийлөгчийг баривчлахаар гэрийнх нь гадаа очсон.

Гэхдээ хамгаалагч болон Юний дэмжигч нарын эсэргүүцлийн улмаас баривчлах ажиллагааг түр зогсоогоод байв.

Баривчлах захирамж нь нэгдүгээр сарын 6-ны өдрийг хүртэл хүчинтэй байсан ч шүүхээс энэ хугацааг сунгасан.
Өчигдөр буюу мягмар гарагт түүнийг огцруулах эсэх шүүх хурлыг эхлүүлсэн ч Ерөнхийлөгч Юн очоогүйн улмаас дөрвөн минут үргэлжлээд дууссан юм.

2024 оны арванхоёрдугаар сарын 14-ний өдөр парламентын гишүүдийн олонх дэмжсэнээр түүний бүрэн эрхийг түдгэлзүүлсэн. Түүнийг огцруулах эсэхийг Үндсэн хуулийн шүүх зургаан сарын дотор шийдэх ёстой.

Эргэн санавал:

• Өмнөд Солонгосын Ерөнхийлөгч цэргийн онц байдал зарлалаа
• Өмнөд Солонгосын Ерөнхийлөгч цэргийн дэглэм тогтоох зарлигаа цуцлав
• БНСУ-ын парламент Ерөнхийлөгчөө огцруулахыг дэмжиж, бүрэн эрхийг нь түдгэлзүүллээ

Эх сурвалж: The Korea Times

БНСУ-ын цагдаа, мөрдөн шалгах албаныхан өнөөдөр өглөөнөөс хойш Ерөнхийлөгчийн өргөөний гадна цугларч, түүнийг баривчлах ажиллагааг эхлүүлсэн.

Улмаар түүнийг 6 орчим цагийн дараа баривчилсныг албаныхан мэдээллээ.

Хэдий бүрэн эрхээ түдгэлзүүлсэн ч Ерөнхийлөгчийн суудлаасаа буугаагүй хүнийг баривчилж буй анхны тохиолдол болж байна.

Ерөнхийлөгч Юн баривчлагдахаасаа өмнө 3 минутын богино мэдэгдэл хийжээ. Түүний мэдэгдэл: 

"Энэ хууль бус мөрдөн шалгах ажиллагаа хэдий ч сөргөлдөөнөөс үүдэн цус урсахаас сэргийлж, би авлигатай тэмцэх газарт очиж байцаалт өгөхөөр шийдлээ. Гэхдээ энэ нь мөрдөн шалгах ажиллагааг хүлээн зөвшөөрч байна гэсэн үг биш. 

Энэ улсын хууль, дүрэм нуран унасан. Ард иргэд та бүхэндээ сайн сайхныг хүсье. Хүчтэй байгаарай. Баярлалаа" гэжээ.