Наадамчдын авто замаас Энхтайваны өргөн чөлөө хүртэлх авто зам, гүүрэн байгууламжийн ажлын талаар НЗХГ болон гүйцэтгэгч "Тотал Инж" ХХК-иас мэдээлэл өгч байна.

Дээрх гүүрэн байгууламжийн ажил 2022 онд эхэлсэн билээ. Тус гүүрийг 2024 оны зургаадугаар сарын 1-нд ашиглалтад оруулна хэмээн мэдээлж байсан.

Гэсэн ч өнгөрсөн долоо хоног буюу энэ сарын 21,22-нд орсон борооны улмаас Туул голын усны түвшин нэмэгдэж тус гүүр усанд автсан байгаа зураг, мэдээлэл цахим сүлжээнд түгсэн юм.

Манай сайтын сурвалжлах баг өчигдөр гүүрний нөхцөл байдлыг сурвалжилсан. Сурвалжилгыг ЭНД-ээс унших боломжтой.

Зургийн инженер Ч.Намшир,  "Ямар тэнэг инженер нь зураг төслийг нь хийгээ вэ гээд байна. Тэр тэнэг инженер нь БИ байна. Дутуу мэдээлэл өгөнгүүт сошиалаар "Монгол Улсад замын инженер байна уу, шороон дээр гүүр тавьчихлаа" гэх юм. 70 мянган хүн амд зориулсан зам ямар байх вэ гэдгийг их тооцоолох шаардлагатай байсан. Өнөөдрийн түгжрэлтэй замд дахин нэг түгжрэлтэй замыг холбож болохгүй.

Олон хувилбарыг зурж хурлаар оруулдаг. Баригдаагүй, усанд автсан гэж байгаа хэсэгт гүүр бий. Төлөвлөлтийн өндөр өөрчлөгдөж байгаа. Нураагаад дахиад баривал улсын мөнгийг шамшигдуулсан асуудал болно. Тийм зүйл болохгүй гэв. 

-Одоо баригдаж буй хэсэгт далан байх ёстой юу?
-Голдирол хаагдахгүй, 800 метр урт гүүр барина. 

Тотел Инж компанийн инженер О.Анхбаяр, Гүүр зам хоёр нь тусдаа тендертэй. Энэ ажил өнгөрсөн оны наймдугаар сарын 20-нд эхэлсэн. 2.8 км зам гэж байгаа боловч массаар нь бодоод үзэхэд орон нутгийн 10 гаруй км замтай дүйхүйц зам юм. Зөвхөн зам биш, дулаан, сүлжээ, бохир, усан хангамжийн систем гэх мэтчилэн олон хийцлэлтэй. Ажил дуусах график хугацаа арванхоёрдугаар сарын 20. Бид төлөвлөгөөт хугацаанаас түрүүлж явж байгаа. 
Үер байх тооцооллыг хийсэн. Усны голдирлыг далангаар чиглүүлж, өөрчилж байгаад ажлаа хийж гүйцэтгэнэ. Өнөөдрийн байдлаар ус тогтсон хотгор газар хараахан ажил эхлээгүй гэсэн үг. Бид гэрээний хугацаанд ажлаа хийж дуусгана гэв.