#Шатар Ийнхүү 1 оноотой болж 80 мянган еврогийн (311 сая төгрөг) шагналын сантай "FIDE Women's Grand Prix 2025 - Pune" тэмцээнийг тэргүүлж эхэллээ.

Олон Улсын шатрын холбоо /FIDE/-оос зохиодог "FIDE Women's Grand Prix" цувралын 2024-2025 оны улирлын тавь дахь тэмцээн Энэтхэг улсын Пуна хотод үргэлжилж байна.

Дэлхийн шилдэг 10 шатарчин цугласан тэмцээний эхний өдөр IM /Олон улсын Мастер/, "The MongolZ" багийн тамирчин Батхуягийн Мөнгөнтуул анх удаа Гран При тэмцээнд оролцож буй Гүржийн Саломе Мелиаг хожлоо.

Ингэснээр тэрээр Хятадын  Жу Жинер, Энэтхэгийн Дивия Дэшмух, Оросын Полина Шувалова нарын ижил 1 оноотой хүснэгтийг тэргүүлж байна.

• Шатрын олон улсын мастер Б.Мөнгөнтуул "The MongolZ" багт нэгдлээ
• Б.Мөнгөнтуулын оролцох Пунагийн Гран При өнөөдөр эхэлнэ
• The MongolZ шигшээ шатны эрхийн төлөө өнөөдөр Falcons-той тоглоно

80 мянган еврогийн (311 сая төгрөг) шагналын сантай "FIDE Women's Grand Prix 2025 - Pune" тэмцээн есөн өдөр үргэлжилнэ. Б.Мөнгөнтуул өнөөдөр 17:30 цагаас хоёр дахь өрөгтөө Хятадын GM /Их Мастер/ дэлхийн эмэгтэй чансааны #11 Жу Жинертэй тоглоно.

Жу Жинер эхний өрөгт Энэтхэгийн Харика Дроновалиг хожсон юм.

FIDE Women's Grand Prix тэмцээний тухай

• Нийт 20 шатарчин зургаан удаагийн Гран При тэмцээнд оролцоно. /Энэ жилийн тухайд 2 тамирчин тэмцээнийг дундаас нь орхиж 2 тамирчин орлосноор 22 тамирчин болсон/
• Нэг шатарчин зөвхөн 3 удаагийн Гран Прид оролцож оноо цуглуулна.
• Гран При бүрт 10 шатарчин оролцож тойргийн журмаар тоглоно.
• Гран При бүрт эзэлсэн байраараа шатарчид улирлын хүснэгтэд оноо цуглуулна
• Хамгийн өндөр оноо цуглуулсан нэг шатарчин улирлын аваргаар тодорно.
• Хамгийн өндөр оноо цуглуулсан хоёр шатарчин ирэх жилийн "FIDE Women Candidates Tournament 2026" тэмцээнд оролцох эрхийг авна.

Б.Мөнгөнтуул Шимкентийн Гран При тэмцээнд 10-р байр эзлэн 15 оноо цуглуулсан бөгөөд өмнөх Монакогийн Гран Прид хоёр тамирчинтай оноо тэнцэн түрүүлж 106.67 оноо авсан. Улмаар Пунагийн Гран Прид оролцож буй суурь 10 оноогоо авснаар нийт 131.67 оноотой улирлын хүснэгтийн 9-р байрт жагсаж байна.

Энэ удаагийн тэмцээнд түүнтэй хамт өрсөлдөж буй Хятадын Жу Жинер 137.5 оноотой 8-р байр, Польшийн Алина Кашлинскаяа 140 оноотой 7-р байр, Энэтхэгийн Конеру Хумпи 171.67 оноотой 6-р байрт тус тус жагсаж байна.

Б.Мөнгөнтуул оны сүүлийн Гран Прид оролцохгүй бөгөөд энэ тэмцээн түүний оноо цуглуулах сүүлийн боломж юм. 

Улирлын хүснэгтийг тэргүүлж буй Оросын Александра Горячкина 308.34 оноотой, 3-р байрт жагсаж буй Казахстаны Бибисара Ассаубаева 197.5 оноотой, 5-рт жагсаж буй Грекийн Страврула Цолакидоу 174.17 оноотой бөгөөд оролцох тэмцээн нь дууссан.

Харин 2-т жагсаж буй 199.17 онотой Украины Анна Музычик, 4-т жагсаж буй 180 оноотой Хятадын Тан Жуни, 8-р байрын Жу Жинер, 9 болон 10-р байрт Б.Мөнгөнтуултай оноо тэнцсэн Украины Мария Музычик, Гүржийн Нана Загнидзе нар улирлын сүүлийн Гран Прид оролцож оноо цуглуулах боломжтой байна.